Investimet e huaja kanë nxitur rritjen në tremujorin e tretë të vitit
Investimet e huaja direkte kanë shënuar një rritje të konsiderueshme në tremujorin e tretë të këtij viti. Sipas të dhënave të publikuara nga Banka e Shqipërisë, fluksi i investimeve të huaja direkte arriti në 449 milionë euro, duke shënuar një rritje prej 10.6% krahasuar me të njëjtën periudhë të vitit të kaluar.
Ky tremujor karakterizohet nga një përshpejtim i investimeve të huaja, pas një rritjeje më modeste të regjistruar në gjysmën e parë të vitit. Të dhënat progresive tregojnë se investimet e huaja direkte vazhdojnë të ruajnë nivele historikisht të larta gjatë këtij viti.
Për periudhën 9-mujore të vitit 2025, vlera e investimeve të huaja direkte arriti në 1.208 miliardë euro, një shifër 4.4% më e lartë se periudha përkatëse e një viti më parë.
Edhe pse detajimi i plotë i investimeve të huaja direkte sipas sektorëve për tremujorin e tretë nuk është ende i disponueshëm, të dhënat nga gjysma e parë e vitit sugjerojnë se pasuritë e paluajtshme mbeten faktori kryesor mbështetës për rritjen e tyre. Gjatë 6-mujorit të parë të vitit 2025, investimet e huaja direkte në pasuri të paluajtshme arritën në 253 milionë euro, duke shënuar një rritje prej 40% krahasuar me 6-mujorin e vitit 2024. Këto investime përbënë mbi 33% të totalit të investimeve të huaja direkte për këtë periudhë, duke shënuar një rritje të ndjeshme nga 24% që zinin një vit më parë.
Tremujori i tretë shënoi një ndryshim të rëndësishëm nga tendencat e viteve të fundit, ku investimet e huaja direkte ishin mbështetur kryesisht nga fitimet e riinvestuara të ndërmarrjeve ekzistuese. Në tremujorin e tretë të vitit, rritja u nxit kryesisht nga flukset e reja të investimeve. Injektimi i kapitalit të ri vlerësohet në 228 milionë euro, duke shënuar një rritje prej 31.8% krahasuar me të njëjtën periudhë të vitit të kaluar.
Gjatë gjithë 9-mujorit, flukset e reja të kapitalit nga investitorët e huaj arritën në 573 milionë euro, duke u rritur me 12.4% krahasuar me të njëjtën periudhë të vitit 2024. Ndërkohë, fitimi i riinvestuar për tremujorin e tretë pësoi një rënie prej 9.4% krahasuar me tremujorin e tretë të vitit 2024, duke arritur në 212 milionë euro. Megjithatë, për periudhën 9-mujore, fitimet e riinvestuara shënuan një rritje të lehtë prej 0.6% krahasuar me një vit më parë, duke arritur në total 632 milionë euro.
Fitimet e riinvestuara përbënë 52% të totalit të investimeve të huaja direkte për 9-mujorin e vitit 2025. Pesha e lartë e fitimeve të riinvestuara është karakteristikë sidomos për sektorët si industria nxjerrëse apo shërbimet financiare, të cilët kërkojnë flukse të vazhdueshme të investimeve të reja për të mbështetur zhvillimin e bizneseve.