Irani ka ekzekutuar sot tre persona të dënuar për grabitje të armatosur, sipas një raportimi nga agjencia e lajmeve e sistemit gjyqësor të vendit.
Irani aplikon dënimin me vdekje për shumë vepra penale dhe, sipas organizatave për të drejtat e njeriut si Amnesty International, është vendi me numrin më të madh të ekzekutimeve, i ndjekur nga Kina.
Agjencia e sistemit gjyqësor në Iran raportoi: “Sot në mëngjes u ekzekutua dënimi me vdekje ndaj tre grabitësve, të cilët kishin kryer grabitje të armatosura në Teheran dhe në qytete të tjera të vendit”.
Sipas drejtësisë iraniane, të dënuarit u gjendën fajtorë për “moharebeh”, një term persian që do të thotë “luftë kundër Zotit”, dhe thuhet se kishin kryer 14 grabitje gjatë muajit prill 2024. Të dënuarit u varën, sqaroi më tej agjencia e lajmeve gjyqësore.
Në fillim të muajit tetor, autoritetet iraniane kishin njoftuar gjithashtu ekzekutimin e gjashtë anëtarëve të një grupi të shpallur fajtor për sulme “terroriste” në provincën e Khuzestanit, në jug të vendit.