Irani përballet me goditje ajrore, ekspertët paralajmërojnë: Hakerat e Teheranit po përgatisin sulme kibernetike në masë!
Firmat e sigurisë kibernetike po japin alarmin për një “rritje” të aktivitetit kriminal të lidhur me shtetin iranian. Këto paralajmërimë vijnë pas një njoftimi nga qendra e inteligjencës kibernetike e qeverisë, e cila i ka informuar kompanitë mbi “një rrezik në rritje” të sulmeve kibernetike, pas goditjeve të kryera ndaj Iranit.
Një ekip inteligjence pranë Nozomi Networks Labs ka raportuar një rritje të aktivitetit të tre grupeve kryesore të lidhura me Iranin, me sektorët e prodhimit dhe transportit si më të shënjestruarit. Megjithatë, ajo që shqetëson më shumë analistët e Nozomi është natyra e këtij aktiviteti. Ata theksojnë se kriminelët kibernetikë nuk po kryejnë sulme në këtë fazë, por përpiqen të fitojnë akses në sisteme duke “hartuar në heshtje mjediset dhe duke vërtetuar aksesin”.
Një zëdhënës i Nozomi-t ka deklaruar: “Ata nuk kanë ndërmarrë ende veprime shkatërruese.”
Një tjetër ekspert i sigurisë kibernetike ka paralajmëruar se ky kërcënim kibernetik në rritje, i kombinuar me kërcënimet fizike të luftës, paraqet “fatkeqësisht një pamje të shkurtër të asaj si duket në të vërtetë lufta moderne”.
Jake Moore, këshilltar global për sigurinë kibernetike në ESET, ka shpjeguar: “Krahas sulmeve fizike, ka indikacione të forta për përçarje dixhitale të përhapur, e cila synon degradimin e komunikimeve dhe rritjen e konfuzionit në momente kritike.” Ai ka shtuar se “Sulmet e mohimit të shërbimit (DDoS) mund të shkatërrojnë komunikimin, i cili është jetësor në kohë të tilla.”
“Ky është një sinjal paralajmërues për të ardhmen dhe është koha që bizneset dhe operatorët e infrastrukturës kritike në Mbretërinë e Bashkuar ta trajtojnë këtë si një sinjal kërcënimi të besueshëm për të shqyrtuar ekspozimin e tyre tani, përpara se të ndodhë një incident i mundshëm,” ka nënvizuar Moore.
Dje, Qendra Kombëtare e Sigurisë Kibernetike e Mbretërisë së Bashkuar u ka kërkuar organizatave të përgatiten për sulme duke u informuar rreth llojeve të ndryshme të sulmeve dhe duke u regjistruar në shërbimin e saj të paralajmërimit të hershëm.
Organizatat me zyra ose zinxhirë furnizimi në rajon duhet të përshtasin “qëndrimin e tyre të sigurisë kibernetike”, potencialisht të rrisin monitorimin dhe të rishikojnë çdo dobësi të jashtme, thuhet në njoftim.