Irani heq kufizimet bërthamore, diplomatët shqetësohen
Teherani njofton se nuk ka më kufizime për programin bërthamor
Irani ka njoftuar se nuk do të respektojë më “kufizimet” që lidhen me programin e tij bërthamor. Megjithatë, vendi theksoi sërish “angazhimin e tij” për zgjidhje diplomatike.
Kjo deklaratë u bë pikërisht në ditën kur skadon marrëveshja ndërkombëtare e arritur 10 vite më parë. Bëhet fjalë për marrëveshjen e njohur si Plani Gjithëpërfshirës i Veprimit të Përbashkët (JCPOA), e nënshkruar në vitin 2015 ndërmjet Iranit dhe vendeve të fuqishme si Franca, Britania, Gjermania, SHBA, Rusia dhe Kina.
Qëllimi i saj ishte të kufizonte aktivitetet bërthamore të Republikës Islamike në këmbim të heqjes së sanksioneve ndërkombëtare të OKB-së. Data e përfundimit të marrëveshjes ishte caktuar për 18 tetor 2025, pra saktësisht 10 vite pas miratimit të saj nga Këshilli i Sigurimit i OKB-së me rezolutën 2231.
Megjithëse Irani mohon, vendet perëndimore dhe Izraeli dyshojnë se Teherani mund të jetë duke zhvilluar fshehurazi një armë bërthamore.
Në deklaratën e tij, Ministria e Jashtme iraniane tha se “të gjitha dispozitat e marrëveshjes, përfshirë kufizimet mbi programin bërthamor dhe mekanizmat përkatës, konsiderohen të përfunduara”.
Sipas kushteve fillestare të marrëveshjes, Iranit i lejohej të pasuronte uranium vetëm deri në 3.67% pastërti, dhe aktivitetet e tij do të mbikëqyreshin rreptësisht nga Agjencia Ndërkombëtare për Energjinë Atomike (IAEA).
