Izraeli vazhdon sulmet në Gaza, të paktën 31 persona humbin jetën
Të paktën 31 persona, përfshirë fëmijë dhe gra, kanë humbur jetën si pasojë e një serie sulmesh ajrore izraelite në Rripin e Gazës të shtunën.
Autoritetet palestineze i përshkruan këto sulme si më të rëndat që nga hyrja në fuqi e fazës së dytë të armëpushimit, të ndërmjetësuar nga Presidenti Trump në tetor.
Ushtria izraelite deklaroi se sulmet ishin një përgjigje ndaj shkeljeve, të cilat ata pretendojnë se janë kryer nga Hamasi të premten.
Forcat Mbrojtëse të Izraelit (IDF) njoftuan se identifikuan tetë militantë që dilnin nga tunelet nëntokësore në Rafah lindore dhe se, së bashku me Agjencinë e Sigurisë së Izraelit (ISA), kishin goditur objektiva të ndryshëm, duke përfshirë një depo armësh, një vend prodhimi armësh dhe dy objekte që i përkisnin Hamasit në Rripin qendror të Gazës.
Nga ana e saj, Hamasi dënoi sulmet dhe i bëri thirrje SHBA-së për veprime të menjëhershme, duke theksuar se “këto shkelje të vazhdueshme tregojnë se qeveria izraelite vazhdon luftën brutale të gjenocidit kundër Rripit të Gazës”.