Izraeli sulmon uzinën më të madhe petrokimike në Iran
Ushtria izraelite ka kryer një sulm në kompleksin e gazit në Parsin Jugor të Iranit, sipas ministrit të mbrojtjes të Izraelit, Israel Katz. Ai deklaroi se ky sulm i fuqishëm synoi uzinën më të madhe petrokimike në vend.
Ky zhvillim vjen pas kërcënimit të Donald Trump për të goditur termocentralet dhe urat e Iranit, nëse Teherani nuk rihap Ngushticën e Hormuzit.
Agjencia shtetërore iraniane e lajmeve Tasnim raportoi se dy kompani që furnizonin me energji elektrike, ujë dhe oksigjen uzinat petrokimike ishin shënjestruar, por vetë uzina nuk kishte pësuar dëme. Agjencia Fars njoftoi për disa shpërthime të dëgjuara në kompleksin e gazit.
Kompleksi South Pars, i cili përfshin fushën më të madhe të gazit në botë, ishte shënjestruar edhe muajin e kaluar nga sulme që Izraeli deklaroi se i kishte kryer vetëm, pa mbështetjen e SHBA-së.