Hën. Sht 24th, 2018

JAPONI – “Toyota” tërheq më shumë se 1 milion automjete hibride nga rreziku për zjarr

TOKIO, 5 shtator . – Prodhuesi japonez i automjeteve “Toyota”, që ka patur shumë sukses me modelin e tij hibrid “Prius”, do të tërheqë më shumë se një milion mjete që kanë këtë teknologji me motor të dyfishtë, benzinë dhe elektrik, për shkak të një rreziku për zjarr.

Rreth 1.026 milionë automjete (Prius Hybride, Prius Hybride Rechargeable dhe C-HR Hybride) të prodhuara mes qershorit 2015 dhe majit 2018 janë thërritur për t’u riparuar, nga të cilat 554 000 në Japoni, 217 000 në Amerikën e Veriut dhe 219 000 në Europë.

“Bëhet fjalë për një problem në lidhjet e motorit. Nëse është grumbulluar pluhur (…), dridhjet gjatë përdorimit të mjetit mund të dëmtojnë izolimin e lidhjeve dhe të bëjnë që kablli të shpërthejë”, shpjegon “Toyota” në një deklaratë.

“Në këto kushte, mund të ndodhë një qark i shkurtër mes fijeve të dëmtuara dhe të gjenerohet nxehtësi. Në një rast ekstrem dhe nëse nxehtësia e shkaktuar është shumë e lartë, kjo mund të shkaktojë një zjarr”, thekson gjiganti japonez.

“Toyota”, një prek kompanive më të mëdha në botë në këtë sektor, kishte paraqitur në vitin 1997 konceptin hibrid, që konsiston në kombinimin e një motori klasik me benzinë me një motor tjetër, elektrik, i ushqyer nga një bateri që karikohet kur automjeti është në lëvizje, frenon apo po zbret një lartësi. Kjo mundëson që të reduktohen ndjeshëm konsumet e karburantit. /G.S/

Kategori