“`html
Nxënësi Ardon Jashari: Një vit në “shkollën” e Luka Modriçit
Duke marrë parasysh kohëzgjatjen e negociatave me Kub Bruzh dhe, mbi të gjitha, shumën e konsiderueshme që Milani investoi për ta blerë përfundimisht (rreth 40 milionë euro me bonuset), pritshmëritë për Ardon Jasharin ishin shumë të larta.
Fatkeqësisht, një dëmtim i rëndë në fund të gushtit – një frakturë e mbyllur e fibulës së djathtë, e pësuar pas një përplasjeje në stërvitje me Santiago Gimenez – i ndërlikoi ndjeshëm situatën.
Pak hapësirë
Mesfushori zviceran u detyrua të qëndronte jashtë fushave për një periudhë të gjatë, gjë që ngadalësoi dukshëm përshtatjen e tij, si te Milani i trajnerit Alegri, ashtu edhe në përgjithësi me stilin e futbollit italian, i cili është mjaft i ndryshëm nga ai belg.
Gjatë mungesës së tij, klubi “Djalli” gjeti ekuilibrin e duhur në mesfushë me Luka Modriçin, i cili dikton ritmin para mbrojtjes.
Në verë, me mbërritjen e kroatit në “Milanello”, mendohej se ai do të luante si mesfushor krahu, si te Reali Madridi. Megjithatë, pas bisedave me Alegri, trajneri vendosi ta pozicionojë si organizator loje.
Në “shkollën” e Modriçit
Me një lojtar si Modriç para tij, bëhet shumë e vështirë për Jasharin të gjejë hapësira.
Megjithatë, zvicerani nuk duhet të dekurajohet. Përkundrazi, duhet ta shfrytëzojë maksimalisht këtë sezon për të mësuar sa më shumë nga një kampion i përmasave të kroatit.
Ky vit mësimi vlen sidomos sepse sezonin e ardhshëm, me një kthim të mundshëm në Europë, Milani do të ketë shumë më tepër ndeshje, dhe është e paimagjinueshme që ish-lojtari i Realit t’i luajë të gjitha.
Pikërisht aty do të hyjë në skenë Jashari, i cili pas këtyre muajve “mësimi” do të duhet të tregojë se është gati të marrë në dorë mesfushën kuqezi.
“`