Kanadaja dhe BE riafirmojnë bashkëpunimin për Ukrainën, Gazën dhe lidhjet e mbrojtjes.
Kanadaja dhe Bashkimi Evropian riafirmuan të mërkurën angazhimin e tyre për thellimin e bashkëpunimit në mbrojtje, tregti dhe politikë të jashtme. Ata përsëritën gjithashtu mbështetjen për Ukrainën dhe përpjekjet për paqe në Gaza, sipas një deklarate të përbashkët.
Ministrja e Jashtme kanadeze Anita Anand dhe shefja e politikës së jashtme të BE-së, Kaja Kallas, bashkëkryesuan takimin e katërt të Komitetit të Përbashkët Ministror (JMC) Kanada-BE, të mbajtur të martën në Niagara. Kjo u bë e ditur në deklaratë.
Të dyja palët përshëndetën përparimet në kuadër të Partneritetit të Sigurisë dhe Mbrojtjes Kanada-BE, të nënshkruar së fundmi, si dhe Partneritetit Strategjik të së Ardhmes. Ata e përshkruan bashkëpunimin e tyre si një “gurthemel të stabilitetit, qëndrueshmërisë dhe prosperitetit përtej Atlantikut”.
Duke riafirmuar “mbështetjen e palëkundur” për sovranitetin dhe integritetin territorial të Ukrainës, BE-ja dhe Kanadaja i kërkuan Rusisë të ndalojë “luftën e saj të agresionit” dhe të zbatojë të drejtën ndërkombëtare humanitare.
“Nuk ka rrugë drejt paqes pa Ukrainën,” thuhet në deklaratë, duke theksuar nevojën për një paqe gjithëpërfshirëse, të drejtë dhe të qëndrueshme, të bazuar në Kartën e OKB-së dhe të drejtën ndërkombëtare.
Ata gjithashtu u zotuan të vazhdojnë të përafrojnë sanksionet kundër Rusisë dhe “atyre që mundësojnë luftën”, si dhe t’i ofrojnë Kievit ndihmë të qëndrueshme financiare dhe ushtarake.
BE-ja dhe Kanadaja mirëpritën fazën e parë të marrëveshjes së armëpushimit, duke përgëzuar përpjekjet diplomatike të udhëhequra nga SHBA-të dhe ndërmjetësuesit rajonalë, si dhe lirimin e pengjeve.
Duke u bërë thirrje të gjitha palëve që ta zbatojnë plotësisht marrëveshjen, ata theksuan rëndësinë e aksesit humanitar “të menjëhershëm dhe të papenguar” në Gaza dhe përsëritën mbështetjen për përpjekjet reformuese të Autoritetit Palestinez dhe kthimin e tij nën qeverisjen e Gazës.
Takimi theksoi gjithashtu bashkëpunimin në rritje në sektorët e mbrojtjes, energjisë dhe dixhitalit.
Të dyja palët ranë dakord të ndjekin një Marrëveshje Tregtare Dixhitale që plotëson Marrëveshjen Gjithëpërfshirëse Ekonomike dhe Tregtare (CETA) Kanada-BE dhe të thellojnë bashkëpunimin në energjinë e pastër, lëndët e para dhe zinxhirët e furnizimit industrial.
Ata u zotuan për forcimin e bashkëpunimit në sigurinë detare, mbrojtjen kibernetike dhe luftimin e kërcënimeve hibride “në komplementaritet me NATO-n”.
Deklarata e përbashkët përfundoi me të dyja palët që shprehën vendosmërinë për të “forcuar më tej partneritetin e tyre të fortë dhe të qëndrueshëm”.