Kapen plot 193 kg marijuanë në kufirin greko-shqiptar
Trafikimi i marijuanës drejt Greqisë vijon me intensitet të lartë. Policia greke ka goditur një tjetër rast të trafikut të drogës, duke sekuestruar një ngarkesë të konsiderueshme në kufirin greko-shqiptar.
Oficerët e policisë nga Departamenti i Narkotikëve të Nëndrejtorit të Hetimit dhe Ndjekjes Penale të Krimit të Janinës, në bashkëpunim me Departamentin e Policisë së Konicës, sekuestruan një sasi të madhe droge në një zonë pranë Konicës, Janinë.
Gjatë kontrolleve të zakonshme të policisë, një shofer mjeti privat, pasi ka kuptuar praninë e policisë dhe për t’i shmangur kontrollit të afërt, ka bërë një kthesë të papritur dhe më pas ka rritur shpejtësinë.
Gjatë tentativës për t’u arratisur, shoferi humbi kontrollin e automjetit, duke bërë që ai të dilte nga rruga dhe të ndalej. Më pas, ai u largua me vrap në këmbë, duke përfituar nga errësira, si dhe nga terreni i pyllëzuar dhe i vështirë i zonës.
Gjatë kontrollit të makinës së braktisur, e cila kishte targa të huaja, u gjetën dhe u sekuestruan 125 pako me marijuanë, me një peshë totale prej 193 kg e 212 gramë.
Mjeti u sekuestrua, ndërsa hetimet nga Departamenti i Narkotikëve, në bashkëpunim me Departamentin e Hetimeve Kriminale të Drejtorisë së Përgjithshme Rajonale të Policisë së Epirit, për të zbuluar identitetin e drejtuesit të mjetit, janë duke vazhduar.
Sasia totale e marijuanës së kapur nga policia greke në dy muajt e fundit, e cila dyshohet se vinte nga Shqipëria, është rreth 435 kg. Rastet e kapura janë: 2 në Selanik, 1 në Kostur, 1 në Janinë dhe 2 në Igumenicë, një prej të cilave në rrugë.