Khamenei, plan arratisje drejt Rusisë?
Udhëheqësi suprem i Republikës Islamike të Iranit, Ajatollah Ali Khamenei, raportohet se ka përgatitur një “plan arratisjeje” drejt Rusisë në rast se protestat mbarëkombëtare në Iran vazhdojnë të përshkallëzohen.
Ky lajm u raportua të dielën nga gazeta britanike The Times, duke cituar burime të inteligjencës. Sipas raportimit, i ashtuquajturi “Plani B” do të përfshinte largimin e Khameneit, 86-vjeçar, së bashku me rreth 20 persona të rrethit të tij të ngushtë, përfshirë anëtarë të familjes dhe bashkëpunëtorë të afërt.
Plani parashikon gjithashtu mënyra për transferimin e rrjetit të tij të gjerë të pasurive financiare, i cili – sipas një hetimi të Reuters të vitit 2013, të cituar nga The Times – vlerësohet rreth 95 miliardë dollarë. Ky rrjet përfshin organizatën Setad, një nga entitetet më të fuqishme ekonomike në Iran, si edhe një sistem fondacionesh gjysmë-shtetërore bamirëse, të njohura për mungesë transparence financiare.
“Plani B është për Khamenein dhe rrethin e tij shumë të ngushtë, përfshirë djalin e tij dhe trashëgimtarin e propozuar, Mojtaba,” shkruan The Times, duke cituar burime të inteligjencës.
Sipas ish-zyrtarit të inteligjencës izraelite, Beni Sabti, Khamenei do të zgjidhte Rusinë si destinacion arratisjeje pasi “nuk ka vend tjetër për të”. Raporti shton se Khamenei ka shprehur më herët admirim për presidentin rus Vladimir Putin dhe ka deklaruar se kultura iraniane është më e afërt me atë ruse.
Sipas The Times, plani i Khameneit i ngjan atij të përdorur nga ish-presidenti sirian Bashar al-Assad, i cili u largua drejt Moskës pas rrëzimit të regjimit të tij në nëntor 2024. Assad aktualisht jeton në Rusi, ku, sipas The Guardian, po rifreskon njohuritë e tij në oftalmologji. Një mik i familjes Assad i tha gazetës britanike se ish-diktatori po studion rusisht dhe po i rikthehet profesionit të tij të mëparshëm, duke lënë të kuptohet se klientela e tij e synuar do të ishte elita e pasur e Moskës.
Ndërkohë, ndërsa protestat vazhdojnë të përhapen në Iran, administrata amerikane po vijon fushatën e saj të “presionit maksimal” ndaj Republikës Islamike. Të dielën, llogaria në gjuhën persiane e Departamentit Amerikan të Shtetit publikoi një fotografi të presidentit Donald Trump me mesazhin: “Presidenti Trump është një njeri i veprimit. Nëse nuk e dinit, tani e dini.” I njëjti mesazh u publikua më herët edhe në llogarinë kryesore të Departamentit të Shtetit, i shoqëruar me një foto të Trumpit përkrah Sekretarit të Shtetit Marco Rubio dhe të Dërguarit Special të SHBA-së, Steve Witkoff.
Trump deklaroi gjithashtu për gazetarët, gjatë një fluturimi me Air Force One, se “nëse ata vrasin njerëz, siç kanë bërë në të kaluarën, do të goditen fort nga Shtetet e Bashkuara”.