Njihuni me Kim Ju Ae, trashëgimtarja e mundshme e Kim Jong Un në Korenë e Veriut
Udhëheqësi i Koresë së Veriut, Kim Jong Un, ka përzgjedhur vajzën e tij si trashëgimtare, sipas një raporti të Agjencisë Kombëtare të Inteligjencës së Koresë së Jugut (NIS) të prezantuar të enjten ligjvënësve.
Pak dihet për Kim Ju Ae, e cila vitet e fundit është fotografuar krah të atit në ngjarje të rëndësishme, si vizita në Pekin në shtator, udhëtimi i saj i parë i njohur jashtë vendit. NIS arriti në këtë përfundim duke analizuar një sërë faktorësh, përfshirë praninë e saj gjithnjë e më të dukshme në publik dhe në ngjarje zyrtare. Agjencia gjithashtu ka deklaruar se do të monitorojë nga afër pjesëmarrjen e saj të mundshme në kongresin e partisë në fund të muajit, ngjarja më e madhe politike në Korenë e Veriut, e cila mbahet një herë në pesë vjet. Ky kongres pritet të zbulojë planet e Phenianit për politikat e jashtme, strategjitë ushtarake dhe ambiciet bërthamore për pesë vitet e ardhshme.
Deputeti Lee Seong-kwen shpjegoi se Ju Ae, e cila më parë ishte përshkruar nga NIS si “në proces trajnimi” për pasardhëse, tashmë ka hyrë në fazën e “përcaktimit si trashëgimtare”. Ai shtoi se, duke pasur parasysh praninë e saj në evente të tilla si përvjetori i themelimit të Ushtrisë Popullore Koreane dhe vizita në Pallatin Kumsusan të Diellit, si dhe shenjat se ka dhënë mendim për politika shtetërore, NIS beson se ajo është në fazën përfundimtare të përcaktimit si trashëgimtare.
Ju Ae është fëmija i vetëm i njohur i Kim Jong Un dhe bashkëshortes së tij, Ri Sol Ju. NIS supozon se Kim Jong Un ka një djalë më të madh, por ky djalë nuk është pranuar kurrë zyrtarisht dhe nuk është shfaqur në mediat shtetërore të Koresë së Veriut.
Lajmi për ekzistencën e Ju Ae u bë publik për herë të parë në vitin 2013 nga basketbollisti amerikan Dennis Rodman, i cili deklaroi për gazetën The Guardian se kishte mbajtur në krahë foshnjën Ju Ae gjatë një vizite në vend.
Ju Ae, për të cilën besohet se është rreth 13 vjeç, u shfaq për herë të parë në televizionin shtetëror në vitin 2022, duke inspektuar raketën më të fundit balistike ndërkontinentale të Koresë së Veriut. Që atëherë, ajo është shfaqur shpesh në mediat shtetërore, duke kontribuar ndoshta në zbutjen e imazhit të babait të saj. Ajo e shoqëroi atë gjatë vizitës në Pekin për paradën më të madhe ushtarake të Kinës. Ajo shihet shpesh me flokë të gjatë dhe veshje të shtrenjta, gjëra që janë të paarritshme për shumicën e njerëzve në vendin e saj.
Një tjetër ligjvënës, Park Sun-won, theksoi se roli i Ju Ae në ngjarjet publike tregon se ajo ka filluar të kontribuojë në politikat e vendit dhe po trajtohet si udhëheqësja de facto e dytë më e lartë.
Pushteti në Korenë e Veriut ka kaluar në tre breza të familjes Kim dhe besohet gjerësisht se Kim Jong Un do t’ia kalojë pushtetin Ju Ae. Në muajt e fundit, ajo është parë duke qëndruar më pranë babait të saj dhe duke ecur krah tij, në vend që ta ndjekë pas. Kjo është simbolikisht e rëndësishme në mediat shtetërore koreano-veriore, ku vendosja e individëve të tjerë pranë udhëheqësit kryesor është e rrallë.
Edhe pse NIS tani beson se Ju Ae është trashëgimtarja e përcaktuar, kjo ngre pikëpyetje. Është e pazakontë që një vajzë të zgjidhet si trashëgimtare mbi një djalë më të madh në një shoqëri thellësisht patriarkale si ajo e Koresë së Veriut. Analistët dhe dezertorët më parë kanë hedhur poshtë mundësinë e një gruaje që drejton vendin, duke përmendur rolet tradicionale gjinore. Megjithatë, motra e Kim Jong Un, Kim Yo Jong, ofron një precedent për autoritetin femëror brenda regjimit, duke mbajtur një post të lartë dhe duke pasur ndikim mbi vëllain e saj.
Mbetet mister pse Kim Jong Un, i cili është ende relativisht i ri dhe duket në gjendje të mirë shëndetësore, po cakton si trashëgimtare një 13-vjeçare. Nuk është e qartë se çfarë ndryshimesh mund të sjellë pasardhja e Ju Ae për Korenë e Veriut. Ndryshe nga shpresat që Kim Jong Un, si një udhëheqës i arsimuar në Perëndim, do të hapte vendin drejt botës, kjo shpresë nuk u realizua. Pavarësisht planeve të saj, pritet që kjo adoleshente të ketë pushtetin e plotë për të formësuar të ardhmen e vendit sipas dëshirës së saj.