Kina akuzon SHBA për sulme kibernetike ndaj infrastrukturës

Pekini ka shtuar paralajmërimet për spiunazh vitet e fundit, Kina akuzon SHBA-në për sulme kibernetike

Kina ka akuzuar Shtetet e Bashkuara për kryerjen e sulmeve kibernetike ndaj qendrës kombëtare të kohës në Pekin. Sipas tyre, këto sulme mund të kishin shkaktuar dëme serioze në infrastrukturën kritike financiare dhe të telekomunikacionit.

Pekini ka shtuar paralajmërimet për spiunazh vitet e fundit, teksa marrëdhëniet me Shtetet e Bashkuara dhe vende të tjera perëndimore janë përkeqësuar. Autoritetet kineze pretenduan se kanë gjetur “prova të pakontestueshme” për përpjekjet e Agjencisë së Sigurisë Kombëtare të SHBA-së (NSA) për të hakuar Qendrën Kombëtare të Shërbimit të Kohës, mes viteve 2022 dhe 2024. Kjo informacion u publikua në llogarinë zyrtare në WeChat të Ministrisë së Sigurisë së Shtetit.

Qendra Kombëtare e Shërbimit të Kohës është përgjegjëse për koordinimin e orëve në mbarë vendin. Koha e saktë përdoret nga një gamë e gjerë sistemesh, duke filluar nga serverët kompjuterë, stacionet hekurudhore dhe rrjetet energjetike.

Ministria kineze akuzoi NSA-në për shfrytëzimin e dobësive në shërbimin e mesazheve të një marke të paidentifikuar të telefonave celularë të huaj, me qëllim që të vidhte fjalëkalimet e punonjësve të qendrës së kohës. Sulmet, sipas ministrisë, mund të kishin rrezikuar rrjetet e energjisë, transportin dhe madje edhe nisjet hapësinore.

Autoritetet kineze kanë deklaruar se që atëherë kanë “ndërprerë zinxhirët e sulmit, kanë përmirësuar masat mbrojtëse dhe kanë eliminuar kërcënimet e mundshme”.

“Në vitet e fundit, SHBA-ja ka ndjekur në mënyrë agresive një hegjemoni kibernetike, duke shkelur vazhdimisht rregullat ndërkombëtare të hapësirës kibernetike,” tha ministria kineze. Ajo u bëri thirrje qytetarëve kinezë të jenë vigjilentë ndaj sulmeve të huaja dhe të raportojnë aktivitetet e dyshimta tek autoritetet.

Në të njëjtën kohë, vendet perëndimore kanë akuzuar grupe hakerash, të cilët thuhet se mbështeten nga Kina, për kryerjen e një fushate globale të spiunazhit kibernetik ndaj figurave që janë kritike ndaj Pekinit, institucioneve demokratike dhe kompanive në sektorë të ndryshëm të ndjeshëm. Uashingtoni tha vitin e kaluar se një aktor i sponsorizuar nga shteti kinez qëndronte pas një sulmi kibernetik në Departamentin amerikan të Thesarit. Pekini i cilësoi akuzat si “të pabaza”.

Scroll to Top