Kryeministri britanik: Kina përbën kërcënim për sigurinë tonë kombëtare
Kryeministri britanik Keir Starmer ka deklaruar se Kina përbën një kërcënim për sigurinë kombëtare të Mbretërisë së Bashkuar, ndërkohë që thekson nevojën për bashkëpunim me Pekinin.
Duke folur gjatë banketit tradicional vjetor të organizuar nga Kryetari i Bashkisë së Londrës, Starmer u shpreh: “Po, ky është një vend që përbën një kërcënim real për sigurinë kombëtare të Mbretërisë së Bashkuar.”
Në të njëjtën kohë, Starmer kritikoi mungesën e stabilitetit të Londrës në marrëdhëniet me Pekinin. Ai theksoi se duhet të braktiset zgjedhja e thjeshtë midis “Epokës së Artë” dhe “Epokës së Akullnajave”, duke pranuar mundësinë për të “punuar dhe tregtuar me një vend duke mbrojtur veten”.
“Përgjigja jonë nuk do të nxitet nga frika dhe as nuk do të zbutet nga iluzionet. Do të bazohet në forcë, qartësi dhe realizëm të matur,” theksoi Kryeministri.
Starmer siguroi se, pavarësisht bashkëpunimit me Pekinin, Mbretëria e Bashkuar do të vazhdojë të kundërshtojë përpjekjet e spiunazhit dhe aktivitetet e paligjshme kibernetike. Ai shtoi se Britania do t’u përgjigjet publikisht sanksioneve të Kinës kundër kompanive të gazit dhe naftës që bashkëpunojnë me Rusinë, si dhe shkeljeve të të drejtave të njeriut.