Kina refuzon të përfshihet në bisedimet me Trump për kontrollin e armëve bërthamore, duke e cilësuar si të padrejtë kërkesën.
Kina ka përsëritur qëndrimin e saj në lidhje me çështjen e kontrollit të armëve bërthamore dhe procesin e denuklearizimit, duke iu përgjigjur deklaratave të presidentit amerikan Donald Trump, i cili tha se kjo temë është diskutuar me udhëheqësit e Kinës dhe Rusisë.
Zëdhënësja e Ministrisë së Jashtme të Kinës, Mao Ning, theksoi se forcat bërthamore kineze “nuk janë në të njëjtin nivel me ato të SHBA-së dhe Rusisë”, duke nënkuptuar se Pekini nuk mund të trajtohet në të njëjtën kategori me dy fuqitë e mëdha bërthamore.
“Në këtë fazë, do të ishte e padrejtë, e paarsyeshme dhe e pamundur të kërkohet nga Kina të marrë pjesë në bisedimet për kontrollin e armëve bërthamore,” tha Mao gjatë konferencës së përditshme për shtyp.
Zëdhënësja shtoi se Pekini e ka bërë tashmë të qartë disa herë pozicionin e tij në lidhje me këtë çështje dhe se Kina mbetet e përkushtuar ndaj parimit të ruajtjes së sigurisë strategjike dhe stabilitetit global.