**Kompensimi për karburantin ende pa u disbursuar, operatorët e Transportit Publik kërkojnë ndërhyrje**
Shoqata Kombëtare e Transportit Qytetas dhe Shoqata e Transportit Urban dhe Interurban i drejtohen me një kërkesë urgjente institucioneve shtetërore për disbursimin e kompensimit për karburantin për muajt mars, prill dhe maj 2026.
Në një letër drejtuar Ministrive të Financave, Ekonomisë, Infrastrukturës dhe Energjetikës, Pushtetit Vendor dhe Bashkisë Tiranë, shoqatat shprehin shqetësimin se pavarësisht plotësimit të dokumentacionit të nevojshëm, operatorët nuk kanë përfituar ende masën financiare të kompensimit për karburantin.
Vendimi i miratuar nga qeveria parashikon një kompensim prej 50 lekësh për litër karburant, për sasinë e konsumuar gjatë muajve mars, prill dhe maj 2026. Operatorët kanë përmbushur të gjitha detyrimet lidhur me dokumentacionin e aktivitetit, sasitë e karburantit të konsumuar dhe elementet e tjera të kërkuara për përfitimin e kompensimit. Megjithatë, pavarësisht kësaj, ata nuk kanë marrë ende pagesën për të tre muajt.
Kjo situatë po krijon vështirësi të konsiderueshme në administrimin financiar të operatorëve, të cilët, duke pritur ekzekutimin e vendimit, kanë vijuar të mbulojnë kostot e aktivitetit me burimet e tyre financiare, duke garantuar kështu vazhdimësinë e shërbimit të transportit publik për qytetarët.
Çmimi i karburantit vijon të qëndrojë në nivele të larta, duke ruajtur të njëjtën barrë financiare mbi operatorët, e cila ishte arsyeja për miratimin e kompensimit. Kjo situatë bëhet edhe më problematike nga dy faktorë: mungesa e disbursimit të kompensimit të miratuar dhe vijimi i çmimeve të larta të karburantit edhe pas periudhës së mbuluar nga vendimi i qeverisë.
Si pasojë, operatorët po përballen me mungesë likuiditeti dhe rritje të kostove operative, çka cenon drejtpërdrejt mundësinë për të mbajtur në qarkullim të gjithë flotën e nevojshme për realizimin normal të shërbimit publik.
Përveç disbursimit të menjëhershëm të shumës së miratuar, dy shoqatat kërkojnë që skema e mbështetjes financiare të vijojë edhe pas muajit maj 2026, për aq kohë sa çmimet e karburantit dhe kushtet ekonomike që justifikuan ndërhyrjen e qeverisë të vazhdojnë të jenë të pranishme.
Shoqatat kërkojnë gjithashtu informacion zyrtar mbi fazën në të cilën ndodhet procesi i kompensimit, arsyet e vonesës dhe një afat konkret për realizimin e pagesave.
Operatorët paralajmërojnë se, në mungesë të një reagimi konkret dhe në kohë nga institucionet përgjegjëse, do të detyrohen të rishikojnë kapacitetet operative dhe numrin e mjeteve të transportit publik që mund të nxjerrin në qarkullim. Kjo masë, megjithëse jo e dëshiruar, do të ishte e domosdoshme për shkak të mungesës së mbështetjes financiare të miratuar dhe vijimit të kostove të larta të karburantit.
Në fund, shoqatat i bëjnë thirrje institucioneve përgjegjëse për trajtim me prioritet të kësaj kërkese, duke vlerësuar rëndësinë sociale dhe ekonomike të transportit publik dhe ndikimin që çdo reduktim i kapaciteteve do të kishte mbi qytetarët.