Koreja e Jugut: Po shqyrtojmë mundësinë e dërgimit të anijeve luftarake në Ngushticën e Hormuzit
Koreja e Jugut po shqyrton me kujdes mundësinë e vendosjes së një anijeje luftarake në Ngushticën e Hormuzit. Ky vendim do të merret në komunikim të ngushtë me Shtetet e Bashkuara, pas kërkesës së Presidentit Amerikan Donald Trump, sipas raporteve të mediave lokale.
Zyra presidenciale e Koresë së Jugut deklaroi të martën se do t’i shqyrtojë me vëmendje thirrjet e Trump, drejtuar aleatëve të SHBA-së, për dërgimin e anijeve luftarake me qëllim të sigurimit të lundrimit të sigurt në Ngushticën e Hormuzit.
“Ne do të jemi në komunikim të ngushtë me SHBA-në lidhur me këtë çështje dhe do të marrim një vendim pas një vlerësimi të kujdesshëm”, thuhet në një deklaratë të zyrës presidenciale.
Vlen të theksohet se edhe Britania po shqyrton dërgimin e anijeve luftarake për të mbajtur të hapur Ngushticën e Hormuzit. Një zëdhënës i Ministrisë Britanike të Mbrojtjes u shpreh: “Siç e kemi thënë më parë, aktualisht po diskutojmë me aleatët dhe partnerët tanë një sërë opsionesh për të siguruar sigurinë e transportit detar në rajon.”