Jorida Tabaku: Korrupsioni po shkatërron ekonominë dhe po minon besimin e shqiptarëve
Deputetja e Partisë Demokratike, Jorida Tabaku, ka reaguar pas publikimit të raportit më të fundit të SPAK mbi korrupsionin në Shqipëri. Ajo theksoi se ky fenomen ka përfshirë ekonominë, administratën publike dhe tregjet kryesore të vendit, duke minuar besimin e qytetarëve dhe perspektivën europiane të Shqipërisë.
Tabaku u shpreh në rrjetet sociale se korrupsioni nuk është thjesht një problem moral apo institucional, por një plagë që po godet drejtpërdrejt ekonominë shqiptare dhe të ardhmen e qytetarëve. Sipas saj, korrupsioni është ndër arsyet kryesore përse shqiptarët po largohen nga vendi dhe, në të njëjtën kohë, një nga pengesat më të mëdha në rrugën e integrimit evropian.
“Korrupsioni po vret ekonominë shqiptare, po vret besimin e qytetarëve te institucionet dhe po vret të ardhmen e tyre. Është arsyeja kryesore pse shqiptarët largohen dhe pse Shqipëria pengohet në procesin e integrimit europian”, theksoi Tabaku.
Deputetja demokrate nënvizoi se sistemi aktual ekonomik dhe institucional është ndërtuar në një mënyrë që, sipas saj, ushqen korrupsionin dhe deformon konkurrencën në treg. Ajo ngriti shqetësimin se prokurimet publike janë kthyer në mekanizma të paracaktuara, ku tenderat jepen pa garë dhe me kosto të shumëfishuara, duke krijuar një ekonomi që funksionon kryesisht rreth kontratave publike dhe jo konkurrencës së lirë.
“Prokurimet publike janë të gjitha të paracaktuara. Është një sistem që jo vetëm shërben për pastrim parash, por jep tendera pa garë, me vlera të shumëfishuara dhe në mënyrë të paracaktuar”, deklaroi ajo.
Tabaku shtoi se kjo situatë ka deformuar ekonominë e tregut, duke shkatërruar konkurrencën dhe duke dëmtuar bizneset e ndershme që nuk janë pjesë e skemave të tenderave publikë.
“Sot ekonomia shqiptare ka vetëm biznese që jetojnë për të marrë tendera. Po ku është ekonomia e tregut? Ku është konkurrenca? Ku është gara?”, pyeti ajo.
Në përfundim, deputetja e PD theksoi se korrupsioni ka kapur fort ekonominë dhe të ardhmen e vendit, duke nënvizuar nevojën për një ndryshim të thellë të sistemit aktual.
“Duhet të ndryshojmë këtë sistem korruptiv që ka kapur ekonominë, të ardhmen e vendit dhe shqiptarët”, përfundoi Tabaku.