Denoncim/ Kosova quhet ‘Metohi’ në librat e gjeografisë në Maqedoninë e Veriut
Në librat e Gjeografisë në Maqedoninë e Veriut, Kosova është paraqitur me emrin ‘Metohi’. Ky fakt është bërë publik përmes një fotografie të shpërndarë në rrjetet sociale nga analistja Nafie Selmani.
Selmani akuzon partinë në pushtet “VLEN” dhe kryeministrin e Kosovës, Albin Kurti, duke argumentuar se ata nuk duhet ta lejonin një gjë të tillë.
Serbia përdor emrin “Metohi” për një pjesë të Kosovës, duke pasur parasysh simbolikën politike dhe fetare si pjesë e territorit të saj.
Analistja Selmani pyet retorikisht në rrjetin social:
- “A është për burrat e VLEN-it Kosova – Kosovë, apo “Metohia”, ashtu siç figuron në librin e Gjeografisë për klasën e shtatë, botim i vitit 2025?”
- “Dhe a është i njoftuar për këtë emërtim mbështetësi i tyre më i madh politik, kryeministri i Kosovës, ai që shquhej për deklarata nacionaliste? A pajtohet edhe ai që Kosova qenka “Metohi”?”
- “A nuk u vjen pak turp burrave të VLEN-it që nuk arrijnë të mbrojnë as gjënë më elementare të identitetit tonë kombëtar? Apo, sipas zakonit, fajin e ka sërish Ali Ahmeti, Taravari, ai, ata, unë…të gjithë vetëm ata nuk kanë faj?”
- “Sa herë duhet t’ju poshtërojnë ata juve, pastaj ju neve, pastaj prapë ata juve, vetëm për atë kockë të vogël pushteti që ua kanë hedhur në sofrën e pushtetit?”
- “A keni të paktën një grimcë guximi politik për të kërkuar tërheqjen e këtij botimi skandaloz, e të provoni se vërtet ekzistoni pak përtej rolit dekorativ në qeveri?”