Kreditimi i Ndërmarrjeve: Anketa e Këshillit të Investimeve zbulon pengesat nga informaliteti te pronat
Bankat në vend po identifikojnë një sërë faktorësh që ndikojnë në vendimet e tyre të kreditimit për Ndërmarrjet Mikro, të Vogla dhe të Mesme (NMVM). Një anketë e realizuar nga Sekretariati i Këshillit të Investimeve (KI), me pjesëmarrjen e bizneseve dhe bankave, ka nxjerrë në pah disa prej këtyre çështjeve, duke përballur qëndrimet e secilës palë.
Sipas anketës, rritja e kreditimit për NMVM-të kufizohet nga:
- Çështjet me regjistrimin e pronës: Këto përfshijnë vonesa në rifreskimin e certifikatave të pronësisë, si dhe përgjigje zyrtare të paqarta lidhur me plotësimin e dokumentacionit.
- Mungesa e kolateralit.
- Nivelet e larta të kredive të vonuara.
- Shifra të dyfishta të raportimit financiar.
- Edukimi joadekuat financiar.
Faktorë të tjerë me ndikim të moderuar përfshijnë mungesën e stafit të dedikuar për grupin e synuar të NMVM-ve dhe mungesën e proceseve plotësisht të digjitalizuara.
“Trajtimi i këtyre çështjeve do të jetë thelbësor për nxitjen e një mjedisi kreditues më mbështetës ndaj sipërmarrjes dhe nxitjen e rritjes së qëndrueshme ekonomike,” thuhet në publikimin e KI.
Megjithatë, rezulton se të paktën 67% e ndërmarrjeve që kanë aplikuar kanë marrë financimin e kërkuar.
Sipas institucioneve financiare, nivelet e larta të informalitetit, çështjet e lidhura me pronën dhe mungesa e informacionit të përditësuar nga rregullatorët ose bashkitë, në lidhje me sektorët ose aktivitetet që kërkon tregu, po pengojnë disi nivelet e kreditimit për NMVM-të.
Gjatë konsultimeve për faktorët ndërlikues të procesit të kreditimit, u përmend edhe mungesa e studimeve që analizojnë nevojat dhe nivelet e ofruesve të shërbimeve, bazuar në dendësinë aktuale të popullsisë dhe kërkesat e paplotësuara.
Në nivel sektori, aksesi i kufizuar në financa krijon vështirësi të konsiderueshme në funksionimin e biznesit për një në dy kompani, kryesisht NMVM-të që operojnë në sektorët e energjisë, bujqësisë dhe turizmit.
Sekretariati ka rekomanduar masa për rritjen e kreditimit, duke përfshirë:
- Përmirësimin e mbledhjes së të dhënave dhe transparencës së ndërmarrjeve.
- Zgjerimin e skemave të garancisë.
- Përshpejtimin e përpjekjeve për dixhitalizimin e shërbimeve bankare.
- Përmirësimin e programeve të edukimit financiar, me fokus tek NMVM-të.