Kroacia rikthen shërbimin ushtarak, ndërsa rritet frika e përhapjes së luftës nga Ukraina
Parlamenti i Kroacisë miratoi të premten rivendosjen e shërbimit të detyrueshëm ushtarak, në një kontekst të tensioneve të larta në Evropë pas pushtimit të plotë të Ukrainës nga Rusia.
Ligjvënësit miratuan ndryshimet ligjore me 84 vota pro, 11 kundër dhe 30 abstenime në parlamentin me 151 anëtarë.
Shërbimi ushtarak do të zgjasë dy muaj dhe do të ofrojë “trajnim bazë ushtarak”, sipas transmetuesit publik HRT. Ky vendim shënon një kthim te rekrutimi i detyrueshëm ushtarak, i cili ishte pezulluar në vitin 2008, kur vendi kaloi në një sistem vullnetar.
Ministria e Mbrojtjes e Kroacisë deklaroi se qëllimi është t’u mësohet të rinjve aftësitë dhe njohuritë themelore, të cilat janë “të nevojshme në situata krize, në mënyrë që ata të kontribuojnë në sigurinë kombëtare”. Autoritetet do të fillojnë t’i thërrasin rekrutët e lindur në vitin 2007 për kontrolle mjekësore deri në fund të vitit.
Rekrutët do të marrin një pagë dhe ata që kundërshtojnë shërbimin ushtarak për arsye ndërgjegjeje do të kenë mundësinë të zgjedhin shërbimin civil në vend të tij, sipas raportit të HRT-së.
Kroacia po forcon forcat e saj të armatosura në një kohë kur shumë vende evropiane po diskutojnë ose po reformojnë politikat e tyre për shërbimin ushtarak.