Shtëpia e Bardhë: Melania Trump ndërmjetësoi për kthimin e gjashtë fëmijëve nga Ukraina te familjet e tyre
Gjashtë fëmijë ukrainas do të kthehen nga Rusia te familjet e tyre në Ukrainë, njoftoi sot Shtëpia e Bardhë. Njoftimi përmendi përpjekjet e Zonjës së Parë Melania Trump për të përshpejtuar kthimin e tyre.
Një fëmijë i shtatë nga Ukraina do t’i bashkohet gjithashtu familjes së tij më vonë këtë muaj, tha zyra e Zonjës së Parë në një deklaratë.
Ukraina raporton se gati 20,000 fëmijë janë transferuar ilegalisht në Rusi dhe Bjellorusi. Ka pretendime se këta fëmijë ndonjëherë i nënshtrohen stërvitjes ushtarake dhe detyrohen të luftojnë kundër vendit të tyre.
Melania Trump i dërgoi një letër Presidentit rus Vladimir Putin në gusht, duke ngritur shqetësimin për gjendjen e vështirë të fëmijëve nga Ukraina, të cilët janë ndarë nga familjet e tyre për shkak të luftës.
Shtëpia e Bardhë theksoi se kjo është hera e katërt që Zonja e Parë e SHBA-së ka kërkuar një kthim të tillë.
“Ribashkimi i fëmijëve me të dashurit e tyre në këtë rajon të botës mbetet një nga çështjet më urgjente globale sot. Jam e inkurajuar që të dyja palët mbeten të përkushtuara për të vazhduar të punojnë së bashku për të rritur sigurinë dhe mirëqenien e fëmijëve në këtë luftë të tmerrshme,” thuhej në deklaratë.
Një hetim i OKB-së i publikuar muajin e kaluar zbuloi se deportimi dhe transferimi i fëmijëve nga Ukraina nga Rusia, pas pushtimit në shkallë të plotë të Moskës në vitin 2022, përbënte krime kundër njerëzimit.
Gjykata Ndërkombëtare Penale ka lëshuar urdhër-arreste për Presidentin Vladimir Putin dhe pesë zyrtarë rusë të tjerë për deportimin e paligjshëm të fëmijëve.
Moska mohon se ka marrë fëmijë kundër vullnetit të tyre, duke pretenduar se po largon vullnetarisht njerëzit nga zonat e luftës.