Jamal: Lojtari që duhet ta udhëheqë Barçën kundër Atletiko Madridit
Barcelona po hyn në një moment vendimtar të sezonit, i cili është ndikuar nga mungesa e rëndësishme e Rafinjës, i cili do të jetë jashtë fushave për të paktën pesë javë. Gjithashtu, forma jo e qëndrueshme e dy sulmuesve kryesorë, Robert Levandovski dhe Ferran Torres, po krijon shqetësime. Polaku, megjithëse shënoi dy herë kundër Njukasëll, nuk ka shënuar në La Liga që nga 28 shkurti, ndërsa Ferran Torres nuk ka gjetur rrugën e rrjetës që nga 31 janari.
Në këtë situatë, Lamine Jamal do të duhet të marrë përsipër një rol shumë më të madh sesa ishte parashikuar. Lojtari i kudondodhur dhe asistuesi kryesor i Barcelonës tashmë ka dëshmuar se nuk e ndien peshën e këtij skenari. Ai është një lider i natyrshëm dhe një lojtar standard për klubin katalanas. Në fushë, ai shquhet si lojtari më i paparashikueshëm dhe kreativ, por tani i kërkohet edhe më shumë, pasi barra sulmuese e skuadrës do t’i bjerë mbi supe.
Përballë këtij momenti kyç, me tre ndeshje kundër Atletikos së Madridit, dy prej të cilave në çerekfinalen e Ligës së Kampionëve, si dhe derbin kundër Espanjollit, Jamal do të duhet të tërheqë skuadrën drejt fitoreve. E gjithë Barcelona do të mbështetet te ai. Pa Rafinjën, Barcelona humbet thellësinë, vertikalitetin, aftësinë për të krijuar raste dhe, mbi të gjitha, forcën drejtuese dhe shpirtin konkurrues. Dhe me dyshimet për golat e Levandovskit dhe Ferran Torres, sulmi i Barçës humbet forcë.
Në këtë kontekst, Jamal bëhet një lojtar kyç. Pritet që ai të gjenerojë raste nga krahu dhe gjithashtu të rrisë efektivitetin e tij si shënues. Në fakt, ai duket më i motivuari në këtë aspekt. Kujtojmë ndeshjen e shkëlqyer që ai zhvilloi kundër Atletikos në ndeshjen e kthimit të gjysmëfinales së Kupës së Mbretit. Pavarësisht se skuadra ishte vetëm një gol larg barazimit, Lamin përfundoi me statistika spektakolare:
- 14 nga 19 driblime të suksesshme (73.6% efektivitet në duele individuale).
- Katër pasime kyçe.
- Dy raste të qarta shënimi të krijuara.
- 14 duele të fituara.
- Asistimi për Mark Bernal në golin e parë.
Barcelona po lufton për të qëndruar në Ligën e Kampionëve në pak më shumë se dy javë dhe gjithashtu për të mbajtur larg Real Madridin në La Liga. Presioni është maksimal dhe përgjegjësia për Lamine Jamalin është e madhe. Në këtë moment kulmor, Barça shpreson që numri 10 të luajë rolin e liderit dhe ta udhëheqë ekipin pas tij.