Gjesti domethënës që po bën xhiron në rrjet: Lokali në Prishtinë ofron kafe dhe çaj falas për tifozët turq
Numërimi ka nisur mbrapsht dhe vetëm pak orë na ndajnë nga fillimi i ndeshjes Kosovë-Turqi. Një gjest i veçantë nga një lokal në Prishtinë po bën xhiron në rrjet.
Në hyrje të kafenesë është vendosur një letër me një mesazh domethënës: “Sot rivalë, por gjithmonë miq! Kafe dhe çaj falas për të gjithë tifozët turq. Ju paguat më 1999, sot nuk keni asnjë detyrim”.
Ky mesazh lidhet drejtpërdrejt me periudhën e luftës së Kosovës, kur Turqia ishte ndër vendet që mbështeti popullin e Kosovës në momentet më të vështira. Pronari i lokalit, përmes këtij gjesti simbolik, ka zgjedhur të rikujtojë mirënjohjen dhe lidhjen historike mes dy shteteve.
Reagimet në rrjetet sociale nuk kanë munguar, me shumë qytetarë që e kanë cilësuar këtë veprim si një shembull përtej rivalitetit sportiv.