Luftë e ashpër për kontrollin e Pokrovskut dhe Kupyanskut midis forcave ruse dhe ukrainase
Forcat ushtarake ruse dhe ukrainase po zhvillojnë luftime të ashpra, përfshirë luftime trup më trup, për kontrollin e Pokrovskut dhe Kupyanskut, dy qytete me rëndësi strategjike në frontin lindor të Ukrainës.
Në Pokrovsk, i njohur si “porta drejt Donetskut”, forcat speciale ukrainase po vazhdojnë beteja të ashpra kundër trupave ruse. Marrja e qytetit nga Rusia do të mundësonte përparimin e mëtejshëm të forcave të Kremlinit dhe marrjen nën kontroll të gjithë rajonit, duke forcuar ndjeshëm pozitat e tyre në lindje të vendit. Një pushtim i mundshëm i Pokrovskut nga rusët do të përbënte fitoren më të madhe territoriale të Moskës brenda Ukrainës që nga rënia e Avdiivkës në fillim të vitit 2024, pas njërës prej betejave më të përgjakshme të luftës.
Sipas një njoftimi të shërbimeve sekrete ukrainase mbi zhvillimet në frontin e Pokrovskut, po zhvillohen luftime të ashpra me forcat pushtuese ruse. Pas një operacioni të suksesshëm zbarkimi, forcat speciale, të cilat kishin marrë pozicione të caktuara, arritën të çanin korridorin tokësor dhe u bashkuan me njësi të tjera speciale. Po vijojnë misione shtesë në qytet, si dhe përpjekje për të frenuar sulmet ruse kundër linjave të furnizimit ukrainas në Pokrovsk.
Ndërkohë, Ministria ruse e Mbrojtjes ka deklaruar se forcat e saj kanë epërsi në betejat rreth qytetit Kupiansk, në verilindje të Ukrainës. Ministria ka pranuar gjithashtu sulmet e natës mbi objektiva në Ukrainë, duke pretenduar se kishin në shënjestër infrastrukturën energjetike që mbështet ushtrinë ukrainase.
Në shtator, Rusia kishte deklaruar se kontrollonte rreth gjysmën e Kupianskut. Ky qytet është një nyje kyçe logjistike dhe transporti, i cili u pushtua nga rusët në javët e para të agresionit, por më pas u rimor nga Ukraina pas një kundërofensive të shpejtë në të njëjtin vit. Megjithatë, Ukraina ka mohuar më parë pretendimet e Rusisë për fitore apo përparime të reja në zonën e Kupianskut.