Qeveria i shpall luftë sheqerit
Administrata Trump i bën thirrje amerikanëve të orientohen drejt proteinave për shëndet më të mirë.
Administrata Trump njoftoi të mërkurën udhëzime të reja, të cilat inkurajojnë amerikanët të konsumojnë më shumë proteina dhe të reduktojnë konsumin e sheqerit. Gjithashtu, sugjerohet shmangia e ushqimeve shumë të përpunuara për përmirësimin e shëndetit.
Këto udhëzime janë pjesë e nismës “Make America Healthy Again” (MAHA), e mbështetur nga Sekretari i Shëndetësisë dhe Shërbimeve Njerëzore, Robert Kennedy Jr. Ai, së bashku me zyrtarë të tjerë të administratës, përfshirë Sekretaren e Bujqësisë Brooke Rollins, kanë ndërmarrë politika që synojnë përmirësimin e shëndetit publik, si kufizimi i aksesit në ushqime të pashëndetshme për përfituesit e kuponëve ushqimorë.
Kennedy dhe Rollins theksuan se udhëzimet e reja kanë për qëllim thjeshtimin e rekomandimeve ushqimore dhe reduktimin e ndikimit të kompanive ushqimore në hartimin e tyre.
Mbështetësit e Kennedy-t dhe nismës MAHA argumentojnë se konsumi i lartë i sheqerit dhe ushqimeve të përpunuara në dietën amerikane ka kontribuar ndjeshëm në rritjen e sëmundjeve kronike.
“Sot, qeveria po i shpall luftë sheqerit,” deklaroi Kennedy gjatë një konference për shtyp në Shtëpinë e Bardhë.
Ndërkohë, rekomandimet ekzistuese për t’i dhënë përparësi frutave, perimeve dhe drithërave të plota, si dhe për të kufizuar yndyrnat e ngopura në 10% të kalorive ditore, mbeten të pandryshuara.
Sipas Kennedy-t, ndjekja e këtyre udhëzimeve do të ndihmojë në uljen e kostove të kujdesit shëndetësor, një çështje e rëndësishme për republikanët përpara zgjedhjeve të vitit 2026.
“Udhëzimet e reja pranojnë se ushqimet e plota dhe ushqyese janë rruga më efektive drejt një shëndeti më të mirë dhe kostove më të ulëta të kujdesit shëndetësor,” u shpreh ai.