Macaulay Culkin, i njohur për rolin e Kevin në “Home Alone”, rrëfen arsyen e largimit nga Hollywood-i në kulmin e famës.
Macaulay Culkin, aktori që u bë i famshëm për rolin e Kevin në filmin “Home Alone”, ka treguar së fundmi arsyet që e shtynë të largohej nga aktrimi në një moshë shumë të re, pavarësisht suksesit të jashtëzakonshëm që pati në Hollywood.
Ai nisi karrierën e tij në moshën 4-vjeçare, duke u shfaqur në seriale televizive si “The Equalizer” dhe filma si “Rocket Gibraltar” dhe “Uncle Buck”. Kulmi i famës për të erdhi me rolin e Kevin McCallister në filmat “Home Alone” dhe “Home Alone 2”, të cilët e kthyen Culkin në një nga fëmijët-aktorë më të famshëm dhe më të paguar të asaj kohe.
Megjithatë, pas filmit “Richie Rich” në vitin 1994, ai u tërhoq papritur nga industria, një vendim që habiti publikun dhe median. Edhe pse gjatë viteve ka pasur disa rikthime sporadike, Culkin shprehet se është “teknikisht i tërhequr” nga aktrimi.
Ai shpjegon se praktika e tij është e tillë: “Tërhiqem dhe nëse gjej diçka që më pëlqen, kthehem, e bëj dhe më pas tërhiqem sërish. Çdo rol është i fundit.”
Sipas Culkin, arsyeja kryesore e largimit nga Hollywood-i ishte presioni i madh nga babai i tij, si dhe dëshira për të jetuar një adoleshencë normale, larg kamerave dhe famës. “Shkova në shkollë të mesme, u dashurova, u deha për herë të parë, gjëra të zakonshme,” rrëfen aktori.
Sot, Culkin pranon role vetëm kur ato e tërheqin vërtet, siç ndodhi me angazhimin e tij në serialin “Fallout”. Për të, motivimi kryesor nuk është më fama apo presioni i industrisë, por kënaqësia personale. “Arsyeja që e bëj tani është thjesht sepse më pëlqen. Pagesa, kënaqësia – kjo është arsyeja për të marrë një rol,” thekson ai.