Macron: Evropa duhet të jetë pjesë e negociatave për Ukrainën
Presidenti francez Emmanuel Macron ka theksuar nevojën që evropianët të jenë të pranishëm në tryezën e negociatave sa herë dhe kudo që zhvillohen bisedime paqeje për t’i dhënë fund luftës në Ukrainë.
“Ne gjithmonë e kemi mbështetur pikëpamjen se, kur zhvillohen negociata, evropianët duhet të jenë në tryezën e negociatave, sepse kjo është në interesin e Evropës”, tha Macron.
Ai shtoi se Antonio Costa, president i Këshillit Evropian, mund të merrte pjesë në negociata të tilla, për sa kohë që roli i tij në atë cilësi do të ishte i përcaktuar qartë.
“BE-ja nuk është dhe nuk ka ndërmend të jetë ndërmjetës në negociatat për t’i dhënë fund luftës në Ukrainë”, sqaroi Presidenti i Këshillit Evropian, Antonio Costa, duke nënvizuar se BE-ja është në anën e Ukrainës dhe do të vazhdojë ta mbështesë atë gjatë luftës dhe pas saj.
Duke iu përgjigjur një pyetjeje në lidhje me kontaktet me Moskën, gjatë konferencës për shtyp që dha menjëherë pas përfundimit të Këshillit Evropian në Bruksel, Costa tha se “për fat të keq nuk kemi shenja të besueshme nga Rusia se ajo dëshiron të marrë pjesë në negociata serioze për momentin”.
Ai shpjegoi, megjithatë, se përmes zyrës së tij kërkon të mbajë një kanal diplomatik komunikimi me Rusinë, pasi sipas tij “nuk mund të mbështetemi vetëm te të tjerët për të interpretuar mesazhet ruse” dhe se BE-ja duhet të jetë në gjendje t’i përcjellë qëndrimet e veta drejtpërdrejt Moskës.