Tensionet SHBA-Venezuelë, Maduro: Jam gjithnjë i hapur për bashkëbisedim
Presidenti venezuelian, Nicolas Maduro, deklaroi të hënën se është i gatshëm të diskutojë në çdo kohë dhe “ballë për ballë” me Donald Trump. Kjo vjen pasi presidenti amerikan la të hapur mundësinë e bisedimeve me homologun e tij venezuelian, në një periudhë kur Uashingtoni ka dislokuar në muajt e fundit mjete me kapacitet të konsiderueshëm në Karaibe, zyrtarisht si pjesë e një operacioni për të luftuar trafikun e drogës.
“Me këdo që dëshiron të flasë me Venezuelën, ne do të flasim ballë për ballë. Pa asnjë problem. Ajo që nuk mund të lejojmë është që populli i krishterë i Venezuelës të bombardohet dhe masakrohet”, tha kreu i shtetit Maduro, duke iu përgjigjur një letre nga një pastor amerikan gjatë një emisioni televiziv javor ku ai merr pjesë.
Ai përsëriti se “dëshiron dialog”, duke shtuar “po për paqen” dhe “jo për luftën”, dhe duke këmbëngulur se kushdo që dëshiron të ketë një dialog me Venezuelën, do të gjejë gjithmonë njerëz për të folur.
Presidenti venezuelian foli për “sektorë të pushtetit” në Shtetet e Bashkuara, pa përmendur askënd me emër, të cilët “duan që Presidenti Trump të kryejë gabimin më të rëndë të të gjithë jetës së tij duke urdhëruar një operacion ushtarak kundër Venezuelës”. Ai shtoi se “ky do të ishte fundi politik i udhëheqjes së tij dhe atyre që po ushtrojnë presion, duke e provokuar”.
Uashingtoni po shqyrton mundësinë e nisjes së sulmeve tokësore në Venezuelë, siç është përmendur vazhdimisht nga presidenti amerikan në javët e fundit. Më parë, Donald Trump u tha gazetarëve se “në një moment do të flas me të”, duke shtuar se Nicolas Maduro “nuk është i mirë për Shtetet e Bashkuara”. I pyetur nëse ai përjashtonte veprimin ushtarak amerikan në Venezuelë, Trump u përgjigj: “Jo, nuk e përjashtoj këtë mundësi, nuk përjashtoj asgjë”.
Që nga gushti, ushtria amerikane ka dislokuar asete gjithnjë e më të fuqishme në Karaibe, përfshirë transportuesin më të madh të avionëve në botë, dhe ka nisur rreth njëzet operacione kundër motoskafeve që, sipas Uashingtonit, transportonin drogë, duke vrarë të paktën 83 persona. Pavarësisht sigurimeve të SHBA-së se ky është një operacion kundër drogës, Karatasi e sheh SHBA-në si një “pretekst” për të imponuar “ndryshim regjimi” në Venezuelë, me qëllim që Uashingtoni të marrë kontrollin e rezervave të mëdha të naftës të vendit latino-amerikan.