“`html
Ngërçi për pagat/ Magjistratët gati kallëzimin penal në SPAK, prokurorët synojnë të bllokojnë pagat e administratës
Ndërsa ngërçi për pagat vijon të thellohet, magjistratët kanë paralajmëruar se do të dorëzojnë ditën e nesërme një kallëzim penal në SPAK, lidhur me këtë çështje. Gazetari Arsen Rusta raporton se penalisht gjyqtarët bëjnë përgjegjës Ministrin e Financave, Petrit Malaj, Sekretarin e Përgjithshëm, Gentian Këri, dhe drejtuesit e Degës së Thesarit në Tiranë.
Nga ana tjetër, prokurorët ditën e nesërme kanë thirrur një mbledhje të drejtuar nga kryeprokurori Olsian Çela, ku do të jenë anëtarët e Këshillit të Lartë të Prokurorisë (KLP) dhe prokurorët e juridiksionit të përgjithshëm. Rruga ligjore e tyre nuk do të jetë kallëzimi penal.
Prokurorët nuk do të bëjnë kallëzim penal pasi janë në konflikt interesi, por ata do t’i drejtohen Gjykatës Administrative me një kërkesë për sigurim padie, për të bllokuar Thesarin dhe llogaritë për gjithë administratën publike deri në ekzekutimin me përmbarim të pagave të tyre.
Sipas magjistratëve, përderisa ata nuk e marrin pagën rregullisht, nuk duhet ta marrin as të tjerët. Rezulton se prokurorët e SPAK i kanë marrë pagat, për shkak se kanë dorëzuar listë-pagesat me vlerat dhe normat e vjetra, ndërsa institucionet e reja kanë çuar listat me pagat e reja. Pasi pagat e reja nuk janë miratuar nga Kuvendi, Ministria e Financave refuzon të aprovojë fondin.
“`