Makina shpërthen në lagjen ushtarake jashtë Moskës, vdes shoferi
Një panik i papritur u përhap të martën në mëngjes në qytetin Balashikha, pranë Moskës, ku një automjet shpërtheu dhe u përfshi nga flakët, duke i marrë jetën shoferit.
Sipas informacioneve paraprake, në një zonë banimi të përdorur kryesisht nga personel ushtarak dhe familjet e tyre, dyshohet se një pajisje shpërthyese me fuqi rreth 300-400 gram TNT ishte vendosur nën sediljen e shoferit.
Autoritetet ruse ende nuk kanë bërë publik identitetin e viktimës, por burime pranë hetimeve thonë se bëhet fjalë për një burrë 62-vjeçar, i cili ka pësuar plagë të rënda nga shpërthimi.
Lagjja ku ndodhi ngjarja është një kompleks banimi i ndërtuar për ushtarakë në pension, veteranë lufte dhe familje të forcave të armatosura.
Pamje të publikuara në rrjetet sociale tregojnë momentin kur një makinë tip BMW X3 shpërthen dhe përfshihet menjëherë nga flakët.
Komiteti Hetimor i Rusisë ka hapur një çështje penale dhe po heton rrethanat e ngjarjes.
Ngjarja ndodh disa muaj pas një tjetër shpërthimi të ngjashëm në të njëjtin qytet, ku një gjeneral i lartë rus humbi jetën në një sulm me makinë-bombë, ngjarje që më pas u trajtua si akt terrorizmi nga autoritetet hetimore.
Pamjet video nga vendi i ngjarjes tregojnë momentin e shpërthimit dhe flakët që e përfshijnë makinën.
“Një mjet shpërtheu në periferi të Moskës. Sipas raportimeve, shoferi humbi jetën në shpërthim. Rrethanat e ngjarjes dhe identiteti i viktimës mbeten të panjohura.”
“Sipas mediave, një mjet shpërthyes ishte vendosur pas shoferit. Viktima 62-vjeçare pësoi një plagë nga shrapnelet në gjoks nga mbrapa. Pajisja shpërthyese shpërtheu disa sekonda pasi makina nisi të lëvizte.”