Projekte të Reja nga Këshilli i Evropës dhe Qeveria Zviceriane, Mbështetje Direkte për AAPSK
Qeveria Zviceriane dhe Këshilli i Evropës kanë shënuar një hap të ri në mbështetjen e Shqipërisë në luftën kundër korrupsionit, krimit të organizuar dhe pastrimit të parave. Kjo mbështetje realizohet nëpërmjet nisjes së dy projekteve të reja të bashkëfinancuara, të cilat synojnë forcimin e institucioneve ligjzbatuese dhe rritjen e efektivitetit në rikuperimin dhe administrimin e pasurive.
Në qendër të kësaj nisme qëndron projekti “Forcimi i qëndrueshmërisë së sektorit publik kundër korrupsionit” (RAC). Ky projekt do të ofrojë mbështetje të drejtpërdrejtë për Agjencinë e Administrimit të Pasurive të Sekuestruara dhe Konfiskuara (AAPSK). Fokusi kryesor do të jetë forcimi i kapaciteteve institucionale, përmirësimi i praktikave të administrimit të pasurive, si dhe promovimi i ripërdorimit social të pasurive të konfiskuara në dobi të komunitetit.
Nëpërmjet asistencës teknike, ekspertizës ndërkombëtare dhe shkëmbimit të praktikave më të mira evropiane, projekti RAC synon të rrisë efektivitetin e agjencive ligjzbatuese në luftën kundër korrupsionit dhe krimit të organizuar. Njëkohësisht, do të forcohet besimi i publikut dhe transparenca në menaxhimin e pasurive të konfiskuara.
Paralelisht, projekti “Lufta kundër pastrimit të parave në Shqipëri” (CMLA) do të mbështesë autoritetet shqiptare në forcimin e kuadrit të parandalimit dhe luftës kundër pastrimit të parave dhe financimit të terrorizmit (AML/CFT). Ky projekt do të zbatohet përmes një qasjeje të bazuar në risk dhe do të ofrojë udhëzime praktike për autoritetet publike dhe subjektet raportuese.
Gjatë aktivitetit të prezantimit, Drejtori i Përgjithshëm për të Drejtat e Njeriut dhe Sundimin e Ligjit në Këshillin e Evropës, Gianluca Esposito, theksoi se fokusi i reformave duhet të zhvendoset nga miratimi i ligjeve drejt efektivitetit të zbatimit të tyre dhe rezultateve konkrete për qytetarët.
Ambasadorja e Zvicrës në Shqipëri, Ruth Huber, nënvizoi se një sistem efektiv kundër pastrimit të parave është thelbësor për mbrojtjen e ekonomisë, konkurrencën e ndershme dhe rrugën evropiane të Shqipërisë.
Kryeadministratorja e AAPSK, znj. Risena Xhaja, vlerësoi rëndësinë e projekteve dhe mbështetjes së vazhdueshme për forcimin e rolit të agjencisë. Ajo u shpreh:
- “Ky projekt përfaqëson një mbështetje shumë të rëndësishme për Agjencinë e Administrimit të Pasurive të Sekuestruara dhe Konfiskuara, jo vetëm në rritjen e kapaciteteve profesionale dhe teknike, por edhe në konsolidimin e qasjes sonë ndaj ripërdorimit social të pasurive të konfiskuara.”
- “Mbështetja me ekspertizë ndërkombëtare dhe praktika të avancuara do të na ndihmojë që këto pasuri të kthehen në vlerë të shtuar për shoqërinë, duke kontribuar drejtpërdrejt në interesin publik dhe në luftën kundër korrupsionit dhe krimit të organizuar.”
Eventi mblodhi përfaqësues të lartë të institucioneve shqiptare, partnerëve ndërkombëtarë, shoqërisë civile dhe medias. Ai shërbeu si një platformë dialogu mbi reformat anti-korrupsion, administrimin e aseteve të sekuestruara dhe konfiskuara, si dhe standardet në zhvillim në fushën AML/CFT, duke diskutuar ndikimin e tyre në nivel kombëtar.