“`html
Banorët e Porto Romanos në alarm: 2800 ton mbetje të rrezikshme ende pa zgjidhje!
Pas marrjes së rezultateve të analizave të kryera në një laborator të specializuar në Itali, të cilat konfirmojnë se mostrat e marra nga 2800 tonët e mbetjeve industriale të kompanisë “Kurum”, të depozituara në Porto Romano të Durrësit, janë të rrezikshme për shëndetin e njeriut dhe mjedisin, banorët e zonave përreth shprehen të shqetësuar për bashkëjetesën e rrezikshme me këto mbetje prej 15 muajsh.
Sipas analizave, mbetjet industriale kanë një toksicitet të theksuar dhe mund të kenë pasoja afatgjata, veçanërisht për ekosistemet ujore. Megjithëse hetimet kanë identifikuar përgjegjësi penale, mbetet ende e paqartë se kush do të marrë përsipër asgjësimin e mbetjeve të rrezikshme dhe ku ato do të asgjësohen.
Për rreth 15 muaj, 2800 ton mbetje të rrezikshme vijojnë të jenë të depozituara në Porto Romano. Publikimi i analizave, që i klasifikojnë ato si potencialisht kancerogjene, ka ngritur alarmin tek banorët dhe ekspertët.
Ndërkohë, në dosjen hetimore ngrihen dyshime edhe për zhdukjen e sasive të tjera me mbetje të dyshimta në zonën e Elbasanit, duke shtuar indiciet për një skemë më të gjerë të menaxhimit të paligjshëm të mbetjeve industriale.
Policia e Durrësit njofton se deri më tani janë ekzekutuar 20 nga 33 masa sigurie, në kuadër të hetimeve për mbetjet e rrezikshme të kompanisë “Kurum”. Këto mbetje u kthyen në Shqipëri në vjeshtën e vitit 2024 nga Singapori, ndërsa destinacioni i tyre ishte Tajlanda.
Hetimet vijojnë për zbardhjen e plotë të përgjegjësive penale, ndërsa fati i 2800 tonëve mbetje të rrezikshme që ndodhen ende në Porto Romano mbetet pa zgjidhje.
“`