Parashikimi i Motit për Muajin Nëntor
Fundjava që përkon me fillimin e muajit nëntor do të karakterizohet nga mot i ngrohtë, me temperatura që pritet të jenë deri në 5 gradë Celsius më të larta se mesataret mujore.
Gjatë ditëve të shtunë dhe të diel, termometri në disa rajone mund të arrijë deri në 26 gradë Celsius, një nivel temperaturash mjaft i lartë, rreth 5-6 gradë më i ngrohtë krahasuar me tetorin. Megjithatë, pritet që të dielën në mbrëmje të ketë zhvillim vranësirash, duke parashikuar fillimin e javës së ardhshme me kushte më pak të qëndrueshme.
Sinoptikanët parashikojnë që, ndryshe nga muaji tetor, nëntori do të jetë një muaj i thatë. Edhe pse nëntori zakonisht është një ndër muajt më të lagësht të klimës shqiptare, për këtë vit parashikohet të jetë relativisht i thatë.
Pjesa e parë e muajit nëntor, deri rreth datës 14-15, pritet të ketë reshje, por ato do të jenë shumë të pakta. Pjesa më e madhe e ditëve do të jenë me diell. Gjatë fundjavës, temperaturat pritet të arrijnë kulmin me deri në 26 gradë Celsius.