“Murtaja” e minjve pushton Australinë Perëndimore, banorët detyrohen të braktisin shtëpitë
Qyteti Morawa në Australinë Perëndimore po përballet me një nga shpërthimet më të rënda të minjve të regjistruara ndonjëherë, duke krijuar një situatë alarmante për banorët dhe fermerët e zonës.
Banorët përshkruajnë një erë të padurueshme që ka mbuluar qytetin, e shkaktuar nga urina, jashtëqitjet dhe kufomat e minjve të ngordhur. Në disa raste, kushtet janë bërë aq të vështira sa familje të tëra janë detyruar të largohen përkohësisht nga shtëpitë e tyre.
Sipas të dhënave të agjencisë shkencore australiane CSIRO, në rajon janë regjistruar deri në 400 fole aktive për hektar, një nivel që tejkalon dhjetë herë pragun që konsiderohet epidemi. Për krahasim, një shpërthim i tillë konsiderohet kur regjistrohen rreth 40 fole aktive për hektar.
“Po matnim nivele që ishin dhjetë herë më të larta se kufiri i epidemisë”, deklaroi fermeri i drithërave Jeff Cosgrove për median britanike The Guardian.
Fermerët raportojnë se minjtë gjenden kudo – në magazina, makina, tavane, mure, dysheme dhe madje edhe në shtretër. Gjatë natës, brejtësit pushtojnë rrugët në numër aq të madh sa banorët i krahasojnë me një “lumë” që lëviz nëpër qytet.
Rajoni është përballur me numra rekord minjsh që nga muaji mars, ndërsa situata është përhapur edhe në zona të tjera, përfshirë rajonin Esperance në jug të shtetit. Paralajmërime për rritjen e popullatës së brejtësve janë dhënë gjithashtu në disa pjesë të Australisë Jugore.
Ekspertët thonë se kushtet ideale klimatike dhe bujqësore kanë favorizuar shpërthimin e popullatës së minjve. Korrjet e bollshme të drithërave, të kombinuara me reshje breshëri që shpërndanë farat në tokë, krijuan burime të shumta ushqimi për brejtësit. Më pas, një vjeshtë e ngrohtë dhe e thatë kontribuoi në shumimin e tyre të shpejtë.
Autoritetet dhe fermerët kanë nisur përdorimin e karremeve me fosfid zinku për të frenuar përhapjen e minjve, ndërsa dëmet ekonomike pritet të jenë të konsiderueshme. Vlerësimet paraprake tregojnë se humbjet për fermerët e Australisë Perëndimore mund të kalojnë 50 milionë dollarë.
Ekspertët e krahasojnë situatën aktuale me shpërthimin masiv të minjve që goditi Australinë lindore në vitin 2021, një nga episodet më të rënda të këtij lloji në historinë e vendit.