Pasojë e rritjes së temperaturave: Për herë të parë në histori, mushkonjat shfaqen në Islandë
Mushkonjat janë zbuluar në tokën islandeze për herë të parë në histori. Deri në muajin maj, Islanda ishte një nga vendet e pakta në planet që nuk kishte një popullsi mushkonjash, për shkak të klimës së saj të pafavorshme dhe mungesës së ujit të ndenjur. E vetmja parajsë tjetër pa mushkonja tani është Antarktida.
Tani, ndryshimi i klimës po e ngroh vendin me një shpejtësi katër herë më të madhe se pjesa tjetër e hemisferës veriore. Ky fenomen po rezulton në shkrirje të paparë të akullnajave dhe valë të shpeshta nxehtësie.
Në maj të këtij viti, Islanda regjistroi ditën e saj më të nxehtë ndonjëherë, me temperatura që u ngjitën në 26.6°C. Ndërkohë, rajone të vendit panë temperatura më shumë se 10°C mbi mesataren gjatë pranverës.
Ekziston frika se kjo ngrohje e shpejtë mund t’i lejojë insektit famëkeq të mbijetojë në vend dhe të vendoset nëpër kënetat dhe pellgjet e tij.