Sulmuesi brazilian Nejmar dëshiron me çdo kusht të marrë pjesë në Botërorin e vitit të ardhshëm. Për të bindur trajnerin Carlo Ancelotti, i cili nuk e ka pasur ende nën urdhrat e tij, Nejmar duhet të tregojë formën e tij në nivele të larta. Duke qenë se kjo duket e vështirë te Santos në Brazil, Nejmar po mendon një rikthim në Europë për një periudhë të fundit në një nga kampionatet kryesore. Ai beson se i mjaftojnë pak muaj për të treguar vlerën e tij dhe për të siguruar një ftesë për Kupën e Botës.
Sipas Fabricio Romano, përfaqësues të lojtarit i kanë ofruar shërbimet e tij klubit të Napolit, si dhe skuadrës kampione të Serie A në fund të sezonit të kaluar, dhe më pas edhe Interit. Ata ishin të gatshëm të fillonin bisedime me të dy klubet nëse shfaqnin interes konkret për të pasur Nejmar në radhët e tyre. Megjithatë, në të dy rastet kanë marrë një përgjigje negative, si për shkak të kushteve financiare jo të përshtatshme, ashtu edhe për gjendjen fizike të lojtarit, i cili vuan vazhdimisht nga probleme që e detyrojnë të bëjë pushim.
Situata mund të bëhet më interesante në muajin janar, pasi Nejmar do të jetë lojtar i lirë dhe mund të transferohet me parametër zero, duke e bërë më të lehtë për çdo klub që e kërkon, qoftë edhe vetëm për pjesën e dytë të sezonit si një përforcim shtesë.