Netanyahu: Izraeli është afër kontrollit të plotë të hapësirës ajrore të Iranit
Kryeministri izraelit, Benjamin Netanyahu, deklaroi gjatë një fjalimi të mbajtur të shtunën në mbrëmje se Izraeli dhe Shtetet e Bashkuara kanë arritur pothuajse kontrollin e plotë mbi hapësirën ajrore iraniane.
Ai theksoi se operacionet ushtarake janë zhvilluar në koordinim me Uashingtonin dhe me mirëkuptimin e Presidentit të SHBA-së, Donald Trump, lidhur me shkallën e kërcënimit që Irani paraqet për Izraelin dhe për bashkësinë ndërkombëtare në përgjithësi.
“Ekzistonte rreziku që Irani të sulmonte objektivat amerikane në rajon dhe Izraelin i pari. Për këtë arsye, ne vendosëm të vepronim të parët,” tha Netanyahu.
Ai shtoi se Izraeli është shndërruar në një fuqi rajonale, duke nënvizuar se ky ndryshim kërkon “guxim, iniciativë dhe marrjen e rreziqeve”. Netanyahu përmendi se ky ka qenë një objektiv kryesor i qeverisë së tij që nga sulmi i Hamasit më 7 tetor.
“Siç premtova dy ditë pas 7 tetorit, ne po e ndryshojmë pamjen e Lindjes së Mesme. Por nuk është vetëm pamja e Lindjes së Mesme, është edhe vetja jonë. Iniciativa dhe veprimet tona të papritura po e ndryshojnë në mënyrë dramatike ekuilibrin e fuqisë midis armikut tonë dhe nesh,” deklaroi ai.