Hetimet për financimet/ “S’kam bërë asgjë të gabuar”, Nigel Farage jep dorëheqjen si deputet: Do të kandidoj sërish, qytetarët do të vendosin!
Lideri i partisë Reform UK, Nigel Farage, ka njoftuar dorëheqjen nga pozita e deputetit për zonën elektorale të Clacton. Ky vendim sjell nevojën për zgjedhje të pjesshme, në të cilat ai ka konfirmuar se do të rikandidojë.
Farage e ka cilësuar votimin e ardhshëm si një përballje mes “popullit dhe establishmentit”, duke theksuar se dëshiron që qytetarët e Clacton të gjykojnë vetë veprimet e tij.
Ky vendim vjen në një kohë kur ai përballet me dy hetime parlamentare lidhur me standardet.
- Hetimi i parë ka të bëjë me pretendimet se ai nuk ka deklaruar përfitime në natyrë të marra nga George Cottrell, i cili më parë është dënuar për vepra penale. Këto përfitime dyshohet se janë marrë një vit para se Farage të zgjidhej deputet në vitin 2024.
- Hetimi i dytë shqyrton pretendimet se Farage nuk ka deklaruar një dhuratë prej 5 milionë paundësh nga miliarderi i kriptomonedhave me bazë në Tajlandë, Christopher Harborne. Edhe kjo dhuratë dyshohet të jetë marrë përpara zgjedhjes së tij në Parlament.
Nigel Farage mohon çdo shkelje të rregullave dhe këmbëngul se nuk ka kryer asnjë veprim të paligjshëm. “E përsëris, nuk kam bërë asgjë të gabuar”, ka deklaruar ai.
Duke shpjeguar vendimin për dorëheqje, Farage tha se dëshiron që votuesit të japin verdiktin e tyre. “Kam vendosur që njerëzit e Clacton të jenë gjykatësit e veprimeve të mia. Këto do të jenë zgjedhje të pjesshme mes popullit dhe establishmentit”, u shpreh ai.
Ai shtoi se do të luftojë për të fituar dhe për të vazhduar, sipas tij, “revolucionin politik” të nisur nga Reform UK.