“`html
Pas rritjes së shpejtë në vitin 2024, pagat shënuan një ngecje këtë vit, duke u ulur në tremujorin e tretë.
Ritmet e rritjes së pagave janë ngadalësuar ndjeshëm gjatë këtij viti, në krahasim me vitin 2024, kur ato shënuan një përmirësim të shpejtë të udhëhequr nga administrata.
INSTAT njoftoi se gjatë tremujorit të tretë të vitit 2025, paga mesatare mujore bruto për një të punësuar me pagë në Shqipëri ishte 83.300 lekë. Kjo përfaqëson një rritje prej 7,3% krahasuar me tremujorin e tretë të vitit 2024. Një vit më parë, rritja kishte qenë 8,36%.
Megjithatë, në krahasim me tremujorin e dytë të vitit 2025, paga mesatare ka shënuar një tendencë në ulje, duke rënë lehtë me 0,7%. Në të njëjtën periudhë të një viti më parë (tremujori i tretë 2024 krahasuar me tremujorin e dytë 2024), rritja kishte qenë 3,4%.
Rënia e pagave në tremujorin e tretë, në krahasim me të dytin, është diktuar kryesisht nga sektorët e Aktivitetit Financiar dhe të Sigurimit, të cilët paguajnë më shumë në vend. Paga mesatare mujore bruto për këtë aktivitet ishte 152 mijë lekë në tremujorin e tretë 2025, ndërsa në tremujorin e dytë ishte 175 mijë lekë, duke shënuar një rënie prej 13%. Megjithatë, kjo rënie lidhet më shumë me efektin e shpërblimeve. Sipas INSTAT, shpërblimet dhe shtesat mbi pagë janë pjesë e pagës mesatare mujore bruto, të cilat në fund të çdo gjashtëmujori rrisin ndjeshëm pagën mesatare mujore bruto.
Pagat sipas aktiviteteve ekonomike:
- Sipas INSTAT, aktivitetet ekonomike me pagë mesatare më të lartë se mesatarja kombëtare ishin:
- Aktivitetet Financiare dhe të Sigurimit, me 152 mijë lekë.
- Informacioni dhe komunikacioni, me 125 mijë lekë.
- Administrata publike dhe mbrojtja; sigurimi social i detyrueshëm; arsimi; shëndetësia dhe aktivitete të punës sociale, me 100 mijë lekë.
- Aktivitete të pasurive të paluajtshme; Aktivitete shkencore, profesionale dhe teknike; aktivitete të shërbimeve administrative dhe mbështetëse, me 89 mijë lekë.
Ndryshimi i pagës mesatare krahasuar me tremujorin e tretë të vitit 2024:
- Rritja më e madhe e pagës ishte në aktivitetin e Ndërtimit, me një rritje prej 12,8%.
- Rritja më e vogël ishte në aktivitetin e Administratës publike, sigurimi social i detyrueshëm, arsimi, shëndetësia dhe aktivitetet e punës sociale, me rreth 3%.
Profesionet me pagë mesatare më të lartë se mesatarja kombëtare ishin:
- Menaxherë, Ligjvënës, Drejtorë ekzekutivë, me 129.7 mijë lekë.
- Specialistë me arsim të lartë (profesionistë), me 110 mijë lekë.
- Forcat e armatosura, me 106 mijë lekë.
- Teknikë dhe specialistë në zbatim, me 92.5 mijë lekë.
Sipas INSTAT, ndryshimi i pagës mesatare krahasuar me tremujorin e tretë të vitit 2024:
- Rritja më e madhe e pagës ishte në profesionin e Zejtarëve, artizanë dhe profesione të lidhura me to dhe Punëtorëve (Profesione elementare), me një rritje përkatësisht prej 10,7% dhe 10,6%.
- Rritja më e vogël ishte në profesionin e Specialistëve me arsim të lartë (profesionistë), me rreth 5,5%.
Gjatë tremujorit të tretë të vitit 2025, krahasuar me të njëjtin tremujor të vitit të kaluar, është vërejtur një ulje e numrit të punonjësve me pagë minimale dhe një rritje e numrit të punonjësve me paga më të larta. Shpërndarja aktuale është më e balancuar dhe më e përqendruar në kategoritë mesatare dhe të larta të pagës.
Burimi: INSTAT
“`