7 ligjet e paketës fiskale botohen në Fletoren Zyrtare, hyjnë në fuqi pas 15 ditësh
Disa ditë pas dekretimit nga Presidenti Bajram Begaj, janë publikuar në Fletoren Zyrtare ligjet e paketës fiskale. Kjo paketë përfshin, ndër të tjera, ligjin “Për Marrëveshjen e Paqes Fiskale” dhe ligjin “Për fshirjen, shuarjen dhe pagesën e detyrimeve tatimore ndaj administratës tatimore qendrore e vendore dhe e detyrimeve të pagueshme në doganë”.
Të gjitha 7 ligjet e paketës fiskale do të hyjnë në fuqi 15 ditë pas publikimit të tyre.
Ligji “Për Marrëveshjen e Paqes Fiskale”
- Hyn në fuqi 15 ditë pas botimit në Fletoren Zyrtare dhe efektet e tij shtrihen deri në vitin tatimor 2028.
- Ministri përgjegjës për financat duhet të miratojë aktet nënligjore brenda 3 muajve nga hyrja në fuqi e ligjit, në zbatim të neneve 10, pika 3, dhe 11, pika 4.
- Drejtori i Përgjithshëm i Tatimeve duhet të miratojë udhëzimin për procedurat e aplikimit të bizneseve në e-Filing brenda 3 muajve nga hyrja në fuqi e ligjit, në zbatim të nenit 11, pika 1.
Ligji “Për fshirjen, shuarjen dhe pagesën e detyrimeve tatimore”
- Hyn në fuqi 15 ditë pas botimit në Fletoren Zyrtare.
- Ministri përgjegjës për financat nxjerr udhëzim për zbatimin e tij brenda 15 ditëve nga hyrja në fuqi.
- Ky ligj ka efekte nga data 1 janar 2026 deri në datën 31 dhjetor 2026.
- Për zbatimin e tij ngarkohen Drejtoria e Përgjithshme e Tatimeve, Drejtoria e Përgjithshme e Doganave, njësitë e qeverisjes vendore dhe Instituti i Sigurimeve Shoqërore.
Ndryshime në ligjin për TVSH
- Ligji “Për disa ndryshime në ligjin nr. 92/2014, “Për tatimin mbi vlerën e shtuar në Republikën e Shqipërisë”, i ndryshuar”, i cili përcakton kompensimin 10% të TVSH për fermerët, hyn në fuqi 15 ditë pas botimit.
Ndryshime në ligjin për procedurat tatimore
- Ligji “Për disa ndryshime dhe shtesa në ligjin nr. 9920, datë 19.5.2008, “Për procedurat tatimore në Republikën e Shqipërisë”, i ndryshuar”, gjithashtu hyn në fuqi 15 ditë pas botimit.
- Ndryshimet kryesore përfshijnë uljen e kufirit të lejuar për pagesat me para në dorë nga 150,000 lekë në 100,000 lekë për transaksionet ndërmjet bizneseve, me qëllim zvogëlimin e përdorimit të parasë fizike dhe nxitjen e pagesave elektronike.
- Gjithashtu, vendoset detyrimi për pajisjen me terminal “POS” në pikat e shitjes të tatimpaguesve që kryejnë veprimtari ekonomike me pagesa në para në dorë, sipas afateve të përcaktuara në ligj.
Të tjera ligje të publikuara
- Në Fletoren Zyrtare janë publikuar edhe ligjet:
- “Për disa ndryshime dhe shtesa në ligjin nr. 29/2023, “Për tatimin mbi të ardhurat”, i ndryshuar”.
- “Për disa shtesa dhe ndryshim në ligjin nr. 9632, datë 30.10.2006, “Për sistemin e taksave vendore”, i ndryshuar”.
- “Për disa ndryshime në ligjin nr. 87/2019, “Për faturën dhe sistemin e monitorimit të qarkullimit”, i ndryshuar”.