“`html
Pakistani dhe Afganistani zhvillojnë bisedime pas sulmeve të fundit në kufi
Zyrtarët pakistanezë do të zhvillojnë bisedime në Katar më 18 tetor me homologët afganë. Ky takim vjen një ditë pasi Islamabadi kreu sulme ajrore në shtetin fqinj, duke shkaktuar vdekjen e të paktën dhjetë personave dhe duke shkelur një armëpushim që kishte sjellë qetësi për dy ditë në kufi.
Sipas televizionit shtetëror në Pakistan, Ministri i Mbrojtjes, Khawaja Asif, dhe shefi i inteligjencës, gjenerali Asim Malik, do të nisen për në Doha për të zhvilluar bisedime me talibanët afganë.
Një zyrtar i qeverisë talibane po ashtu konfirmoi zhvillimin e bisedimeve. Zëdhënësi i qeverisë talibane, Zabihullah Mujahid, shkroi në platformën X se një delegacion i nivelit të lartë nga Emirati Islamik, i udhëhequr nga ministri i Mbrojtjes, Mohammed Yaqub, është nisur për në Doha.
Një armëpushim 48-orësh kishte ndalur gati një javë përplasje të përgjakshme në kufi, të cilat kishin shkaktuar vdekjen e dhjetëra ushtarëve dhe civilëve nga të dyja palët. Megjithatë, të premten në mbrëmje, Afganistani akuzoi Pakistanin për shkelje të armëpushimit.
Një zyrtar taliban deklaroi për AFP se “Pakistani e ka shkelur armëpushimin dhe ka bombarduar tri lokacione në provincën Paktika. Afganistani do të kundërpërgjigjet”.
Sipas zyrtarëve shëndetësorë, të cilët folën në kushte anonimiteti, dhjetë civilë u vranë dhe 12 të tjerë u plagosën nga sulmet, duke përfshirë dy fëmijë mes viktimave.
Nga ana tjetër, një zyrtar pakistanez tha se forcat e tij kishin kryer “sulme precize ajrore” në zonat përgjatë kufirit afgan, duke shënjestruar grupin Hafiz Gul Bahadur. Ky grup, një fraksion lokal i lidhur me Tehreek-e-Taliban Pakistan (TTP), akuzohet nga Pakistani si përgjegjës për sulmet vdekjeprurëse me bombë dhe armë zjarri në një kamp ushtarak në Waziristanin Verior, pranë kufirit me Afganistanin, ku humbën jetën shtatë trupa paramilitarë pakistanezë.
Çështjet e sigurisë mbeten në qendër të tensioneve. Pakistani akuzon Afganistanin se strehon grupe militante të udhëhequra nga TTP, një pretendim që Kabuli e mohon.
Dhuna ndërkufitare është rritur ndjeshëm që nga e shtuna, disa ditë pas shpërthimeve që tronditën kryeqytetin afgan Kabul, në kohën kur ministri i Jashtëm taliban ndërmori një vizitë të paprecedentë në Indi, rivalin historik të Pakistanit. Talibanët nisën më pas një ofensivë përgjatë pjesëve të kufirit të tyre jugor me Pakistanin, duke shtyrë Islamabadin të premtojë kundërpërgjigje.
Kur nisi armëpushimi të mërkurën, Pakistani deklaroi se do të zgjaste për 48 orë, ndërsa Kabuli tha se armëpushimi do të ishte në fuqi derisa Pakistani ta shkelte atë. Zëdhënësi i qeverisë talibane u shpreh se forcat afgane janë urdhëruar të mos sulmojnë, përveçse nëse forcat pakistaneze sulmojnë të parat. Në rast sulmi nga Pakistani, Afganistani ka të drejtë të mbrohet.
“`