Parlamenti i Pakistanit miratoi një ndryshim kushtetues, i cili u jep imunitet të përjetshëm presidentit dhe shefit aktual të ushtrisë ndaj çdo ndjekjeje penale. Opozita e ka cilësuar këtë vendim si një “goditje fatale për demokracinë”.
Ky ndryshim, i cili është i 27-ti kushtetues i miratuar, u miratua me shumicë dy të tretat fillimisht në Asamblenë Kombëtare dhe më pas në Senat. Ai zgjeron kompetencat e shefit të ushtrisë pakistaneze dhe kufizon rolin e pavarësinë e Gjykatës së Lartë të vendit.
Ushtria, duke qenë institucioni më i fuqishëm në Pakistan, ka qeverisur vendin për gati gjysmën e historisë së tij që nga pavarësia në vitin 1947. Megjithëse ajo mohon akuzat për ndërhyrje në politikë, ajo akuzohet rregullisht për to.
Teksti i miratuar, i cili tani pret nënshkrimin e presidentit për të hyrë në fuqi, krijon postin e ri të “Shefit të Forcave të Mbrojtjes”. Këtë detyrë do ta kryejë shefi aktual i shtabit të ushtrisë, Asim Munir, duke e vendosur atë mbi komandantët e Marinës dhe Aviacionit Ushtarak. Të gjithë oficerët që promovohen në gradën “marshall ushtarak”, siç ndodhi me Munirin në maj pas një përplasjeje të shpejtë me Indinë, do të mbajnë përjetë gradën, privilegjet dhe imunitetin ndaj çdo procesi gjyqësor.
Imunitet i përjetshëm u jepet edhe presidentit aktual, Asif Ali Zardari. Ndryshimi krijon gjithashtu një Gjykatë Kushtetuese Federale të re, e cila do të jetë e vetmja kompetente për çështje kushtetuese, duke ia hequr këto kompetenca Gjykatës së Lartë. Kjo e fundit humb pavarësinë, pasi qeveria do të mund të ndryshojë gjyqtarët sipas dëshirës.
“Kjo është goditja përfundimtare ndaj pavarësisë së gjyqësorit dhe funksionimit të demokracisë”, deklaroi për AFP-në Syed Zulfiqar Bukhari, zëdhënës i PTI-së (partia kryesore opozitare). Deputetët e PTI-së grisën kopjet e tekstit dhe lanë sallën para votimit.
“Ata i dhanë presidentit imunitet të përjetshëm dhe krijuan një sistem që përqendron pushtetin te një oficer i vetëm ushtarak”, tha Salman Akram Raja, sekretar i përgjithshëm i PTI-së. “Ky ndryshim do të forcojë autoritarizmin dhe pak demokraci që kishte mbetur do të zhduket”, shprehet i shqetësuar avokati nga Islamabadi, Osama Malik.
Sipas shqetësimeve të ngritura, ky tekst jo vetëm heq kontrollin civil mbi ushtrinë, por shkatërron edhe hierarkinë ushtarake, ku më parë të gjithë komandantët ishin të barabartë. Ndryshimet pritet të shkatërrojnë çdo pavarësi të gjyqësorit, duke i lejuar qeverisë të shpërblejë gjyqtarët e bindur dhe të dënojë të tjerët duke i transferuar në gjykata të largëta.