Presidenti i Panamasë: Stërvitjet ushtarake amerikane nuk përbëjnë kërcënim për Venezuelën
Presidenti i Panamasë, Jose Raul Mulino, deklaroi se stërvitjet ushtarake amerikane të zhvilluara në vendin e tij nuk përbëjnë një “akt armiqësor kundër Venezuelës”. Trupat amerikane kanë zhvilluar gjatë këtij viti ushtrime të mbijetesës dhe taktikave luftarake në xhunglën Darien, në kufirin me Kolumbinë, si dhe në një bazë policore në bregdetin e Karaibeve.
Këto ushtrime vijnë në një kohë kur Shtetet e Bashkuara kanë forcuar praninë e tyre ushtarake në Karaibe, me qëllimin e deklaruar për të luftuar kartelët e drogës. Megjithatë, qeveria e Venezuelës pretendon se këto veprime janë pjesë e një strategjie për të rrëzuar Presidentin Nicolas Maduro.
“Panamaja nuk dorëzon territorin e saj për asnjë lloj akti armiqësor kundër Venezuelës apo ndonjë vendi tjetër në botë,” theksoi Presidenti Mulino gjatë konferencës së tij javore për shtyp.
Në prill, Shtetet e Bashkuara dhe Panama nënshkruan një marrëveshje bashkëpunimi, e cila lejon vendosjen e forcave ushtarake amerikane pranë Kanalit të Panamasë, pas kërkesave të Presidentit të SHBA-së, Donald Trump. Kjo marrëveshje i lejon Shtetet e Bashkuara të përdorin bazat ajrore dhe detare panameze për të kryer “ushtrime” për tre vitet e ardhshme.
“Nuk ka asnjë lloj pranie ushtarake që nuk është e autorizuar nga Panama,” sqaroi Presidenti José Raúl Mulino.