Papa Françesku: Përballë tundimeve të dominimit, Zoti zgjedh të bëhet njeri në Natën e Krishtlindjes
Papa Françesku drejtoi Meshën e parë të Natës së Krishtlindjeve në Bazilikën e Shën Pjetrit në Vatikan, duke përcjellë një mesazh të fuqishëm mbi dinjitetin njerëzor, lirinë dhe dashurinë hyjnore, në një botë të karakterizuar nga padrejtësia dhe shtypja.
“Ndërsa një ekonomi e shtrembëruar na nxit t’i trajtojmë njerëzit si mallra, Zoti zgjedh të bëhet si ne, duke zbuluar kështu dinjitetin e pafund të çdo individi. Kur njeriu synon të bëhet Zot për të sunduar mbi të afërmin e tij, Zoti dëshiron të bëhet njeri për të na çliruar nga çdo formë skllavërie,” theksoi Papa Françesku në homelinë e tij, duke shtruar pyetjen se nëse kjo dashuri është e mjaftueshme për të transformuar historinë e njerëzimit.
Ati i Shenjtë ftoi besimtarët të “admirojnë urtësinë e Krishtlindjes”, duke theksuar se përballë dhunës dhe shtypjes, Zoti, përmes Jezu Krishtit Fëmijë, i dhuron botës një jetë të re: jetën e Tij, për të gjithë.
Liturgjia solemne u bashkëkremtua nga rreth 250 kardinalë, peshkopë dhe priftërinj pranë Altarit qendror të Rrëfimit. Kori i Kapelës Sistine shoqëroi hyrjen e Papës me këngën tradicionale “Noel”. Para fillimit të Meshës, Papa Françesku zbuloi figurën e Jezusit Fëmijë në skenën e lindjes së Krishtit, e vendosur para Altarit të Rrëfimit. Ky gjest u pasua nga një homazh me lule nga fëmijë të ardhur nga vende të ndryshme të botës, duke përfshirë edhe Ukrainën.
Sipas Zyrës së Shtypit të Selisë së Shenjtë, rreth 6,000 besimtarë morën pjesë në Meshë brenda Bazilikës, ndërsa rreth 5,000 të tjerë e ndoqën ceremoninë jashtë, në sheshin e Shën Pjetrit, pavarësisht reshjeve.
Pak para Meshës, Papa doli papritur në shesh për të përshëndetur besimtarët, duke u shprehur: “Faleminderit që erdhët edhe në shi! Urimet më të mira të gjithëve!”
“Duam ta festojmë Krishtlindjen së bashku. Jezu Krishti, i cili lindi për ne, na sjell paqen dhe dashurinë e Zotit. Zoti ju mbroftë dhe ju bekoftë ju dhe familjet tuaja,” shtoi ai.