Gjermania dhe Britania Paralajmërojnë BE: Armatosuni Kundër Një Sulmi të Mundshëm Rus
Udhëheqësit ushtarakë të Gjermanisë dhe Britanisë së Madhe u kanë bërë thirrje europianëve të armatosen përballë një sulmi të mundshëm rus. Mediat raportojnë se zyrtarët më të lartë nga Gjermania dhe Mbretëria e Bashkuar kanë paralajmëruar se vendet evropiane duhet të përballen me realitetin e vështirë të sigurisë së tyre dhe të marrin vendime sfiduese lidhur me shpenzimet.
“Grumbullimi ushtarak i Moskës, i kombinuar me gatishmërinë e saj për të zhvilluar luftë në kontinentin tonë, siç u dëshmua në mënyrë tragjike në Ukrainë, paraqet një rrezik në rritje që kërkon vëmendjen tonë kolektive,” thanë shefi i mbrojtjes i Gjermanisë, gjenerali Carsten Breuer, dhe shefi i shtabit të mbrojtjes së Mbretërisë së Bashkuar, Marshalli Ajror Sir Richard Knighton.
Ata argumentuan se, megjithëse shtetet anëtare të Bashkimit Evropian (të cilin Mbretëria e Bashkuar nuk e përbën më) kanë dyfishuar shpenzimet e tyre të mbrojtjes gjatë dekadës së fundit, nevojiten më tej investime. “Është e qartë se kërcënimet me të cilat përballemi kërkojnë një ndryshim në qasjen tonë ndaj mbrojtjes dhe sigurisë. Riarmatimi nuk është nxitës lufte, por është veprimi përgjegjës i kombeve të vendosura për të mbrojtur popullin e tyre dhe për të ruajtur paqen,” theksuan ata.