18-vjeçarët do të sigurojnë menjëherë një profesion, ja çfarë synon plani i ri evropian
Një direktivë e re evropiane propozon ndryshime në rregullat ekzistuese për patentat e shoferit në vendet anëtare, duke përfshirë mundësinë që 18-vjeçarët të pajisen me patentë profesionale të kategorisë C.
Qëllimi kryesor i kësaj direktive është forcimi i sigurisë rrugore dhe ulja e numrit të aksidenteve automobilistike, të cilat aktualisht rezultojnë në rreth 20.000 viktima në rrugët evropiane çdo vit.
Direktiva e re parashikon:
- Futjen e standardeve të reja për trajnimin dhe testimin për marrjen e patentës.
- Kontrollin mjekësor të detyrueshëm para dhënies së patentës.
- Ndëshkime më të rrepta për drejtuesit e rinj.
- Vendosjen e një afati vlefshmërie për patentat.
- Një ndryshim të plotë të kuadrit ligjor për shkeljet rrugore të kryera nga shoferë të huaj brenda Bashkimit Evropian.
Ky plan synon gjithashtu t’i japë zgjidhje një problemi të madh që prek transportin në Evropë: mungesën e shoferëve të kamionëve. Sipas të dhënave të Bashkimit Ndërkombëtar të Transportit Rrugor (IRU), në vitin 2024 mungesa e shoferëve arriti në 3,6 milionë vende të lira pune në 36 vende të studiuara, duke mbetur në nivele të ngjashme me vitin 2023. Megjithatë, pabarazia në moshë po rritet, duke krijuar një “bombë demografike” në sektorin e transportit.