Përmbytjet shkaktojnë katastrofë në Azinë Jugore, rreth 600 viktima javën e fundit
Reshjet e rrëmbyeshme të shiut gjatë një jave kanë shkaktuar përmbytje dhe rrëshqitje masive tokëshe në pjesë të Azisë Jugore, duke lënë pas rreth 600 persona të vdekur. Shirat ciklonikë, të përkeqësuar nga stuhitë tropikale, kanë sjellë disa nga përmbytjet më të rënda të rajonit në vite, duke prekur miliona njerëz në Indonezi, Malajzi, Tajlandë dhe Sri Lanka.
Reshjet e dendura filluan në ishullin indonezian të Sumatrës të mërkurën. Një banor i Bireuen, në provincën Aceh të Sumatrës, tha për agjencinë e lajmeve Reuters: “Gjatë përmbytjes, gjithçka u zhduk”. Me qindra persona që ende rezultojnë të zhdukur, numri i viktimave pritet të rritet. Mijëra njerëz mbeten të bllokuar, disa prej të cilëve presin shpëtim në çatinë e shtëpive të tyre.
Deri të shtunën, më shumë se 300 persona kishin humbur jetën në Indonezi dhe 160 në Tajlandë. Po ashtu, janë raportuar edhe disa viktima në Malajzi. Ndërkohë, në Sri Lanka, e cila është goditur nga shira të rrëmbyeshëm dhe një ciklon, më shumë se 130 persona kanë vdekur dhe rreth 170 të tjerë janë të zhdukur, sipas zyrtarëve.
Një ciklon tropikal jashtëzakonisht i rrallë, Senyar, ka shkaktuar rrëshqitje katastrofike të dheut dhe përmbytje, duke rrëmbyer shtëpi dhe duke zhytur mijëra ndërtesa në ujë. Agjencia e menaxhimit të fatkeqësive natyrore të Indonezisë njoftoi të shtunën se gati 300 persona rezultojnë ende të zhdukur pas përmbytjeve që shkatërruan Sumatrën. Moti i keq ka vështirësuar operacionet e shpëtimit dhe, ndërsa dhjetëra mijëra njerëz janë evakuuar, qindra të tjerë mbeten ende të bllokuar, sipas agjencisë indoneziane të fatkeqësive.