Përplasje lidhur me Presidentin: LVV pretendon se i ofruan firmat Osmanit, Presidenca i mohon
Shefja e Grupit Parlamentar të Lëvizjes Vetëvendosje (LVV), Arbërie Nagavci, deklaroi në një konferencë për media se LVV propozoi Glauk Konjufcën për President të Republikës, pasi nuk u arrit një marrëveshje për një kandidat konsensual me opozitën.
Nagavci shtoi se Lëvizja Vetëvendosje i kishte ofruar Presidentes aktuale, Vjosa Osmani, 30 nënshkrime për të hyrë në garë në Kuvend, por sipas saj, Osmani nuk e ka pranuar këtë ofertë.
“Ka pasur interesim për kandidimin e Presidentes edhe për një mandat. I kemi ofruar Vjosa Osmanit nënshkrimet për kandidaturën e saj, deri tani asnjë subjekt i tillë s’e ka bërë një gjë të tillë. Osmani s’ka pranuar këtë ofertë”, – tha Nagavci.
Kjo deklaratë u përgënjeshtrua menjëherë nga Presidenca e Kosovës. Nëpërmjet një njoftimi në Facebook, Presidenca deklaroi se një gjë e tillë nuk ka ndodhur dhe se kjo është e pavërtetë.
“Presidentja Osmani demanton se i janë ofruar nënshkrimet dhe përkrahja nga LVV për rizgjedhje si Presidente e Republikës së Kosovës. Kjo është gënjeshtër!”, – thuhet në reagim.
Pas këtij mohimi, Nagavci reagoi sërish, duke garantuar se Lëvizja Vetëvendosje i ofron nënshkrimet edhe për Vjosa Osmanin.
“…sot i garantoj nënshkrimet e deputetëve, nëse themi që nuk është e vërtetë, unë sot jam e gatshme që të garantojë në emër të Lëvizjes që të ofrojë nënshkrime për të vazhduar garën”, – tha shefja e deputetëve të LVV.
Këtë të mërkurë, në Kuvendin e Kosovës u dorëzuan vetëm nënshkrimet e LVV për Glauk Konjufcën. Kryetarja e Kuvendit, Albulena Haxhiu, tha se nuk mund ta thërriste seancën pasi, sipas Kushtetutës, duhet të ketë të paktën dy kandidatë.
Afati i fundit për zgjedhjen e Presidentit të ri të Kosovës është të enjten.