Polemika pas deklaratës së Macron për sulme “me dronë dhe raketa të shumta”, qeveria e Qipros i mohon
Një postim i presidentit francez, Emmanuel Macron, lidhur me situatën e sigurisë në Qipro ka nxitur debate, pasi ai përmendi sulme “me dronë dhe raketa të shumta” kundër ishullit. Sipas Macron, Franca ka marrë masa solidariteti duke vendosur fregatën Languedoc dhe një njësi të mbrojtjes ajrore Mistral në rajon, ndërsa aeroplanmbajtësja Charles de Gaulle u dërgua pranë Qipros.
Megjithatë, zëdhënësi i qeverisë së Republikës së Qipros, Konstantinos Letymbiotis, deklaroi më 10 mars 2026 se nuk ka pasur sulme të tilla. “Nuk ka diçka të tillë”, u shpreh ai, duke mohuar kështu interpretimin e Macron.
Raportimet aktuale tregojnë se Qipro u përball me një incident të vetëm në bazën britanike në Akrotiri, ku një dron shkaktoi dëme në një hangar. Të nesërmen, u interceptuan dy dronë dhe pati ngritje avionësh F-16, por pa asnjë incident të konfirmuar.
Analistët theksojnë se përdorimi i shumësisë nga Macron në postimet e tij nuk duket të jetë një gabim përkthimi, pasi edhe versioni në frëngjisht e përmend këtë: “Nous avons immédiatement pris des mesures de solidarité avec Chypre, qui a été frappée par plusieurs drones et raketes”.
Deklarata e presidentit francez ka ngritur pyetje rreth interpretimit të ngjarjeve dhe mesazhit që ajo dërgon në kuadrin e sigurisë së Evropës Jugore dhe pranisë ushtarake franceze në Mesdheun Lindor.